Ima naammagittaalliuuteqassaatit

Pisortanit ikiorsiissutit pillugit qinnuteqaruit, oqartussaasut qinnuteqaatit suliarissavaat. Oqartussaasut qinnuteqaatit suliarineranut atatillugu aalajangiissapput. Tamakkiisumik akuerisineqarsinnaavutit, ilaannakortumik akuerineqarsinnaallutit imaluunniit itigartinneqarsinnaallutit.
Tamakkiisumik akuerineqanngikkuit aalajangiinerlu isumaqataaffiginagu, aalajangiineq pillugu naammagittaalliuuteqarsinnaavutit.
Oqartussasut aalajangiinerat allaganngorlugu tigusanni, naammagittaalliuuteqarnissaq pillugu ersarissumik ilitsersuuteqassaaq. Tassa imaappoq, sumut naammagittaalliuuteqassavit, qanoq naammagittaalliuuteqassavit aamma qaqugu naammagittaalliuutip nassiunneqarnissaanut piffissarititaq pillugit paasissutissanik imaqassaaq.
Isumaginninnermi Naammagittaalliuuteqartarfiup aalajangiineri inaarutaapput taamaattumillu oqartussamut allamut allaffissornikkut naammagittaalliuutigineqarsinnaanatik. Aalajangiinerit eqqartuussivinnut suliassanngortinneqarsinnaapput.

Aalajangiineq tigusat pillugu isumaqataanngikkuit aamma aalajangiineq pillugu naammagittaalliuuteqassaguit, naammagittaalliuuteqarnerit Isumaginninnermi Naammagittaalliuuteqartarfimmut, allaffissornikkut naammagittaalliuuteqartarfittut oqartussaasut qullersaannut, nassiutissavat.
Isumaginninnermi Naammagittaalliuuteqartarfik naammagittaalliuuteqarnerit suliarissavaa aalajangiillunilu. Assersuutigalugu aalajangiineq imaassinnaavoq suliareqqitassanngortitsilluni utertinneqartoq. Tamanna isumaqarpoq, qinnuteqaatit kommunip aallaqqaataaniit suliarissagaa. Isumaginninnermi Naammagittaalliuuteqartarfik aalajangiineq pillugu aamma atuutsitsiinnarluni aalajangiisinnaavoq imaluunniit naammagittaalliuuteqarnerit isumaqataaffigalugu.

Isumaginninnermi Naammagittaalliuuteqartarfimmut assigiinngitsunik naammagittaalliuuteqarsinnaavutit:

• MitID-qaruit, naammagittaalliuuteqarnissamut immersugassaq attaveqaatitigoortumik nassiussinnaavat. Maalaaruteqarit
• Immersugassaq immersoruk Isumaginninnermi Naammagittaalliuuteqartarfimmut nassiullugu. Immersugassaq nassaariuk uani
• allakkamik allallutit
• e-mailimik allallutit
• sianerlutit
• nammineq saaffiginnillutit

Isumaginninnermi Naammagittaalliuuteqartarfimmut suliamik suliarinninneranut iluaqutaassaaq, ilanngullugit nassiukkukkit makkua:

• allakkatigut aalajangiineq, aalajangiineq allakkatigut tigusimagukku.
• Kommunimiit allagaatinik allanik peqaruit

Malugiuk
Isumaginninnermi Naammagittaalliuuteqartarfik pillugu nittartagaani paasiniaagit aua.gl/ka/isumaginnittoqarneq. Nittartakkami aamma Isumaginninnermi Naammagittaalliuuteqartarfiup tunngaviusumik aalajangigai pillugit atuarsinnaavatit, nunarput tamakkerlugu kommuninit malinneqartussat.

Eqqumaffigissavat, kommunip aalajangiinera pillugu naammagittaalliuuteqarnissamut piffissaliussaq aallaaviatigut sapaatit akunneri arfiniliummata.
Kommunip aalajangiinermini naammagittaalliuuteqarnissamut ilitsersuummi ilinnut tunniussaani ersarissumik takuneqarsinnaassaaq.

• Ikiorsiissutit annertussusileriikkat
• Pisariaqartitsineq malillugu ikiorsiissutit
• Paasissutissiinissamut pisussaaffeqarneq il.il.
• Suliffissarsiortunut ikiorsiissutit