Kakkiussaq: Illut sanaqataaffiusoq
Illu sanaqataaffiusoq tassaavoq illu aalajangersimasoq akuerisaq. Piffissami matumani Illorput 2100 akuerisaavoq.
Illu sanaqaassiusussatut katiteriaannartut tunniunneqartarpoq, sumiiffimmilu sananeqartarluni. Aammalu taarsigassarsisoq/sanaqataasoq suleqatigalugu sanasut ilinniarsimasut ikiortigalugit illu sananeqassaaq.
Illunut sanaqataaffiusunut inatsit malillugu, illumik sanaqataaffiusumik sananissamut imaluunniit tigusinissamut taarsigassarsinissamik kommunimut qinnuteqarsinnaavutit.
Taamaattoq Ilulissani, Aasianni, Sisimiuni, Nuummi imaluunniit Qaqortumi najugaqaruit tamanna periarfissaanngilaq. Kommuni illumik sanaqataaffiusumik nutaamik sananissamut, kisianni aamma illumik sanaqataaffiusumik sananeqareersumik tigusinissamut, tamatumalu saniatigut illunik sanaqataaffiusunik naammassineqanngitsunut taarsigassarsititsisinnaavoq.
Kommunimit taarsigassarsiat ukiuni 20-ni erniaqartinneqaratillu akilersugassaanngillat, ukiut tamaasa annertoqatigiimmik aningaasartalinnik annikillisikkiaartuarneqassallutik.
Taarsigassarsisutut nammineeerlutit aningaasartuutit tamakkiisut 5 %-ii akilersinnaavatit.
Inoqutigiinni ukiumut isertitat akileraaruteqataasussat 300.000 koruuninit annertuneruppata, kommunip taarsigassarsiarititai 5.882 koruuninut tamaginnut inoqutigiit 300.000 koruunit qaangerlugit isertitarisaannut 1 %-mik annikillisinneqassapput.
Illit imaluunniit inoqutigiittut 600.000 koruunit sinnerlugit isertitaqarussi, kommuni illunut sanaqataaffiusunut taarsigassarsititsisinnaanngilaq.
Tassa imaappoq:
Illumik sanaqataaffiusumik katillugu 1 mio. Koruuninik akilimmik sanarusukkuit, inoqutigiittullu katillugit 400.000 koruuninik isertitaqarussi, annerpaamik 780.000 koruuninik kommunimit taarsigassarsisinnaatitaassaatit.
Aningaasartai imatut naatsorsorneqarput:
300.000 koruunimut killiliussaq inoqutigiit isertitaasa 100.000 koruunimik qaangerpaat.
100.000-it 5.882-nik agguarlugu tassaavoq 17.
17 + 5 = 22.
Katillugu nammineq 22 %-imik akiliuteqassaatit.
Pisumi matumani 220.000 koruunit nammineerlutit akilissavatit.
Taamaattumillu pisumi matumani, erniaqaratillu akilersugassaanngitsunik kommunimit 780.000 koruuninik taarsigassarsisinnaassaatit.
Kommuni aamma pingaarnersiuissaaq, taamaalilluni sumiiffinni pisortat illuutaannik attartortakkanik inoqanngitsoqareersuni imaluunniit illunik sanaqataaffiusunik imaluunniit nammineq illulianik najorneqanngitsunik inissianik pisariaqartitsinermik naammassinniffiusinnaasuni, illunik sanaqataaffiusunik sananissamut taarsigassarsititsisoqarsinnaanani.
Kommunip taarsigassarsiat illup qularnaveeqqusiunneratigut isumannaassavai.
Illu najugaqarfissatut siunertaqarmat, inuussutissarsiutinik ingerlatsivittut atorneqaqqusaanngilaq. Kisiannili inuussutissarsiutit iluanaarnannginnerusut akuerineqarsinnaapput, inissiat annersaa najugaqarfittut atorneqarluni, soorlu inissiami ini ataaseq ulluunerani paaqqinniffittut isikkanilluunniit passussivittut atorneqarpat.
Taarsigassarsititsinissamik neriorsuutip tunniunneqareernerata kingorna ukiut marluk qaangiutsinnagit illu naammassillugu sananeqareersimallunilu atorneqalereersimassaaq, taamaanngippat taarsigassasititsinissamik neriorsuut atorunnaarsinneqassaaq. Illunik ilaannakortumik sanaartortoqarnissaa pinaveersaartinniarlugu taamaaliortoqarpoq.
Piginnittussaatitaaneq inaarutaasumik qularnaveeqqusiussaqarluni taarsigassarsititsinermut uppernarsaat tunniunneqareerpat aatsaat kommunimit qinnuteqartumut nuutinneqassaaq.
Illumi sanaqataaffiusumi najugaqartussaatitaaneq atuuppoq. Tassa ukiumut minnerpaamik ulluni 180-ini illu najugaqarfigissavat.
Ukiut 20-t qaangiuppata illuliortiternermut aningaasalersuineq pillugu inatsit malillugu iluarsartuussinissamut taarsigassarsiassanik kommunimut qinnuteqarsinnaavutit.
Taarsigassarsinissamut qinnuteqaat kommunimut nassiunneqassaaq.
Qinnuteqaammi ilanngunneqassapput:
- Illumut sanaqataaffiusumut kissaatigineqartumut nassuiaat
- Nunaminertamik qinnuteqarnerup assilinera
- Nammineq aningaasalersuinerup pissarsiarineqarsinnaaneranut uppernarsaat
- Pilersaarutaasumik piffissakkaartumillu aserfallatsaaliinissamut akiliisinnaanermut uppernarsaat
- CPR-normut aammalu najugaqarnermut allagartaq
Kommunip suliassamik suliarinninneq isumagissavaa, ilaatigut tassaallutik sanaartornermi atortussanik neqeroorummik, sanasunit neqeroorummik piniarneq aamma sananermi aningaasartuutissat tamakkiisut missingersuusiorneri, kiisalu ingerlatsinermut missingersuutit.
Missingersuut akuerissavat, tamatumalu kingorna taarsigassarsititsinissamik neriorsuut pillugu kommunimit attavigineqassaatit.