Inooqataanermi kulturikkullu pingaartitsinerit pissutigalugit najukkami radioqarfiit aamma tv-qarfiit atatinnissaat Namminersorlutik Oqartussat soqutigisaraat. Namminersorlutik Oqartussat taamaattumik tapiissuteqarnernik aaqqissuussinernik pingasunik pilersitsisimapput:
- Najukkami radioqarfinnut aamma tv-qarfinnut aallakaatitassiornermut tapiissutit
- Najukkami radioqarfinnut aamma tv-qarfinnut tunngaviusumik tapiissutit
- Najukkani radiukkut tv-kullu aallakaatitsiviit sulisuinut ilinniagaqaqqinnissamut ilinniaqqinnissamulluunniit tapiissutit.
Tapiissuteqarnermik aaqqissuussinerit taakku Nunatsinni Tusagassiutilerisut Kattuffiat, NTK aqqutigalugu agguaanneqartarput.
Aallakaatitassiornermut tapiissutit:
Aallakaatitassiornermut tapiissutinik tunniussisoqartassaaq aallakaatitsiviit akuerisaasumik namminerisaminnik aallakaatitassiaat tunngavigalugit kvartalit qaangiunnerini tamani. Namminerisamik aallakaatitassiat akunnernut agguataarneqartassapput, aallakaatitassiornermut tapiissutinit aningaasaliiffigineqartunik agguarneqartassallutik kvartalinullu sisamaasunut (4) agguataarneqartassallutik.
Aallakaatitassiornisamut tapiissutit taamaallaat inuit tamat pillugit suliaasunut najukkami tv-qarfiit nammineq aallakaatitassiaannut tapiissutaasinnaapput.
Najukkami radioqarfinnut aamma tv-qarfinnut tunngaviusumik tapiissutit aamma Ilinniaqqinnernut aamma ingerlaqqiffiusumik ilinniagaqarnernut najukkami radioqarfinni aamma tv-qarfinni sulisunut tapiissutit pillugit allaaserinninnerni attuumassuteqartuni annertunerusumik atuarsinnaavit.
Malugiuk
Najukkami radioqarfimmik aamma tv-qarfimmik nutaamik aallartitsinissamut Namminersorlutik Oqartussaniit tapiissutinik qinnuteqarsinnaanngilatit.
Aallakaatitassiornissamut tapiissutit annertussusaannut apeqqutaapput qinnuteqartut amerlassusaat
Aallakaatitaasiornissamut tapiissutinik qinnuteqarnissamut aallakaatitassiorfik:
1) aallakaatitsisinnaanermut akuersissummik atuuttumik peqassaaq.
2) missingersuutit, naatsorsuutit kukkunersiuisoqarnerlu pillugit maleruagassiaat eqquutsissavai.
3) aallakaatitassiornermik ingerlatsinermut uppernarsaatit pillugit maleruagassiaat eqquutsissavai.
4) sumiiffimmi innuttaasut sumiiffimmi nutaarsiassanik ilisimatittassavai.
5) sumiiffimmi innuttaasut oqaaseqarnissamut periarfissaqartissavai.
6) aallakaatitassiornermik ingerlatsinermini ilaatigut aallakaatissavai siammartissallugilluunniit aallakaatitassiat aaqqissorneqarsimasut, aallakaatitsiviup nammineerluni suliai imaluunniit aallakaatitsiviup aallakaatitassiornermik ingerlatsivinnik allanik suleqateqarluni pingaarnertut aallakaatitassiortuulluni suliai (nammineerluni aallakaatitassiat). Aallakaatitseqqiinerit, ussassaarutit aallakaatitassiallu aaqqissorneqarsimanngitsut nammineerluni aallakaatitassiatut isigineqanngillat.
7) aallakaatitassianik meeqqat ukiukinnerit timikkut, tarnikkut ileqqorissaarnikkulluunniit ineriartornerminni annertuumik ajoquserneqaatigisinnaasaannik, matumani pingaartumik aallakaatitassianik atoqatigiinnermut tunngasunik imaluunniit pissuteqanngivilluni nukersornermik imaqartunik aallakaatitsisoqannginnissaa qulakkiissavaa. Ilanngutassiat sakkortuumik nukersornermik imaqartut imaluunniit isiginnaagassat kanngunartut pillugit aallakaatitsivik tusarnaartartunut isiginnaartartunullu mianersoqqusisassaaq.
8) aallakaatitassianik ammip qalipaataanik, arnaanermik/angutaanermik, upperisamik, sumit naggueqarnermik, nunamit suminngaanneernermik, politikkikkut isummanik anguteqammilluunniit/arnaqammilluunniit atoqateqartartuunermik pissuteqartumik qinngarsuilernissamut aqqutissiueqataasinnaasunik aallakaatitsisoqannginnissaa qulakkiissavaa.
Qaammatit tamaasa kingusinnerpaamik 5-iani aallakaatitsiviup tapiissutinik pissarsisimasutut qaammammi qaangiuttumi aallakaatissimasaminut nalunaarsuiffini nassiutissavaa. Aallakaatitassiakkaartumik nalunaarsorneqassapput:
- aallakaatitap taaguutaa
- minutsinik qassinik sivisussuseqarsimanera
- oqaatsit
- imarisai
- najukkami nutaarsiassanut aamma aallakaatitassianullu.
Aammalu nalunaarsorneqassapput minutsinut qaammami pineqartumi nammineerluni aallakaatitassiat, nipilersuutit atorneqartut, pilerisaarutit aamma taamaattoqassappat satellit-ikkoortumik tv-mi radiumiluunniit aallakaatinneqarsimasut.
Aallakaatitassiornermut tapiissutinik qinnuteqaateqarniarussi qinnuteqarnissamut immersuiffissamik immersuissaasi.
NemID-mik peqanngikkuit qinnuteqarnissamut immersugassaq immersoriarlugu allanik pappialanik pisariaqartunik kakkiussillutit uunga NTK-mut nassiussissaatit.
Una toorlugu aallakatitassiornermut tapiissutinik qinnuteqarnermi immersugassaq aasinnaavat.
Malugiuk
Qinnuteqaatit fax-ikkut nassiussinnaanngilat.
Qinnuteqarnissamut piffissaliussap kingorna qaammatip ataatsip missaani qinnuteqaatissinnut akissutisisaasi.
Ukiup siuliani 150.000,00 kr.-init ikinnerusunik tapiiffigineqarsimagussi naatsorsuutit nammineq naatsorsuuserisorisamit kukkunersiuisunilluunniit akuerisanit kukkunersiorneqarsimassapput.
Ukiup siuliani 150.000 kr.-inik amerlanernilluunniit tapiiffigineqarsimagussi naatsorsuutit naatsorsuuserisunit naalagaaffimmit akuerisamit kukkunersiorneqarsimassapput.
Ilanngullugit naatsorsuutit akuersissutigineqarsimallutillu atsiorneqarsimassapput siulersuisunit tamarmiusunit ilanngullugulu kukkunersiuinermit nalunaarut ilanngunneqarsimassaaq.
Qinnuteqarnissamut piffissaliussat ukiut tamaasa 5. januar, 5. april, 5. juli aamma 5. oktober.
Aalajangiinerit uku Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmut naammagittaalliuutigineqarsinnaapput:
- Tapiiffigineqarnissamik qinnuteqaammut itigartitsineq
- Tapiissutit unitsinneqarneri pillugit aalajangiinerit
- Tapiissutit tamakkiisumik ilaannakuusumilluunniit utertillugit akilerneqarnissai
- Pikkorissarnerni peqataanissaq pillugu qinnuteqaatip itigartinneqarnera
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmit aalajangiinerit allaffissornikkut oqartussanut allanut naammagittaalliuutigineqarsinnaanngillat.