Qimminut qimuttunut nakorsaatit

Qimminut qimuttunut nakorsaatit atorlugit katsorsaasarnerit Namminersorlutik Oqartussanit siunissami akisussaaffigineqarnissaat Naalakkersuisut akuersissutiginikuuaat. Taamaammat uumasut nakorsai Uumasunut Nakorsaqarnermi Inuussutissalerinermullu Oqartussaaffeqarfimmeersut siunissami nakorsaatinut allagartaliisinnaapput, taakkulu nakorsaataasivimmut qaninnerpaamut aaneqarsinnaassapput.

Uumasunut Nakorsaqarnermi Inuussutissalerinermullu Oqartussat Kalaallit Nunaanni Peqqinnissaqarfik suleqatigalugu misiligutaasumik februar 2023-mi suliniut qaammatinik 12-nik sivisussuseqartussaq aallarnisarpaat, tassuunakkullu nakorsaatinik tunniussisarnerit Ilulissani Nunap immikkoortuani Napparsimmavimmit aamma Qaanaami Peqqissaavimmit isumagineqartassallutik.

Misiligutaasumik suliniut ataavartumik nalilersorneqartassaaq, nakorsaataasiviillu tamakku qimminik qimuttoqarfinni peqqissaavinnut napparsimmavinnullu amerlanernut kingusinnerusukkut siaruaanneqarsinnaanerat neriuutaavoq.

Nappaatinik pisariunngitsunik soorlu nipaallisaatit antibiotekallu atorlugit qumaqarneq pillugu katsorsaanissamut nakorsaatit pingaarutillit nakorsaataasivimmiitinneqartassapput.

Uumasut nakorsai kisimik uumasunut nakorsaasiisinnaatitaapput. Pisariaqartitsinermi namminerlu toqqortaatinit pisinnaanngikkaanni uumasunut nakorsaatinik taamaallaat tunniussisoqarsinnaavoq.

Qimmeq qimuttoq katsorsarniaraanni qimmeq chip-eqartussaavoq, Uumareg-imilu nalunaarsorneqarsimassalluni. Qimmiutinnut chip-normunik kommunimit pissarsisinnaavutit.

Piginnittumik oqaloqateqarneq tunngavigalugu assit videolu atorlugit uumasut nakorsaat nappaammik suussusersinnaassaaq, qimminullu qimuttunut nakorsaammik innersuussilluni. Qimmip pisariaqartitsinerani nakorsaat taamaallaat innersuunneqarsinnaavoq.
Uumasut nakorsaata illit nakkutilliisussaralutillu iliuuseqartussaatitaraatit, taamaammallu uumasut nakorsaat ikiorniarlugu uumasup qanoq inneranik illit nassuiaanissat misissuinissallu pingaaruteqarpoq.

Attaveqarnissamut paasissutissat:
Oqarasuaat: +299 345000 (uumasut nakorsai apeqqutigineqassapput))
E-mail: uumasut@nanoq.gl
Ammasarfiit: Ataasinngornermiit tallimanngornermut nal. 09:00-15:00

Paasissutissat uumasut nakorsaannut paasissutissat tusarliussassat:

1. Kinaavit sumilu najugaqarpit?
2. Qimmeq sorleq pineqarpa? (Chipnormu, suiaassusia, ukiui, nappatigisaatalu attuumassutillip nalunaarsorsimanera)
3. Qimmip suna ajoqutigaa? Qanoq sivisutigisumik?
4. Qimmeq pisarnermisut nerisaqartarpa?
5. Pissusilersuutai allanngornikuuppat?
6. Qimmit allat assinganik pissuseqarpat akornuteqarpalluunniit?
7. Paasissutissat attuumassutillit uumasut nakorsaanut nassiutikkit, ilanngussinnaavatillu qimmimik assilisat videolialluunniit.
   

Ilulissani nakorsaatinik qanoq pissarsisinnaavit:

1. Nakorsaammut akileeqqusissummik qanorlu iliorlutit akiliuteqarnissamik nassinneqassaatit.
   a. Mobilepay imaluunniit aningaaserivikkut nuussinikkut (ingerlaannartumik nuussinikkut).
2. Nakorsaat akilerneqassaaq.
3. Akiliutissaq tiguneqariarpat nakorsaatip allagartaa uummasut nakorsaata Ilulissani nakorsaataasivimmut nassiutissavaa. Tamatuma kingorna nakorsaat saaffiginnittarfimmut aaneqarsinnaavoq.
   a. Ammasarfiit: Ataasinngornermiit tallimanngornermut 09:00-16:00, sisamanngornermi 17:00-p tungaanut.
4. Uumasut nakorsaata peqqusinera malillugu nakorsaat atorneqassaaq. Apeqqutissaqartoqarnerani uummasut nakorsaat attavigeqqinneqarsinnaavoq.
   
   

Qaanaami nakorsaat qanoq pissarsiarineqarsinnaava?

1.  Nakorsaammut akileeqqusissummik qanorlu iliorlutit akiliuteqarnissamik nassinneqassaatit.
   a. Mobilepay imaluunniit aningaaserivikkut nuussinikkut (ingerlaannartumik nuussinikkut).
2. Nakorsaat akilerneqassaaq.
3. Akiliutissaq tiguneqariarpat nakorsaatip allagartaa Sullissivik Qaanaamut uumasut nakorsaannit nassiunneqassaaq. Nakorsaatip allagartaa Kommunip ammasarfiini aaneqassaaq.
4. Nakorsaataasiviup ammanerani nakorsaatip allagartaa peqqissaavimmut nassarneqassaaq. Nakorsaat tunniunneqartarpoq tallimanngornermi nal. 13:00-14:30
5. Uumasut nakorsaata peqqusinera malillugu nakorsaat atorneqassaaq. Apeqqutissaqartoqarnerani uummasut nakorsaat attavigeqqinneqarsinnaavoq.
   
   

Nakorsaaseereernerup kingorna qimmeq suli napparsimappat, taava:
Uumasut nakorsaat attavigineqaqqissaaq.

Nakorsaataasivimmit nakorsaammik aallersinnaannginnermi:
Nakorsaataasivimmit nakorsaammik aallersinnaannginnermi, Donnas Dyreklinik Nuummiittoq suli attavigineqarsinnaavoq, akiliuteqareernermilu oqarasuaat atorlugu nakorsiartitsinissaq nakorsaammillu nassiussinissaq periarfissaavoq.
Attaveqarfigisassanik paasissutissat il.il. Donnas Dyreklinikip nittartagaaniipput.

Donna's uumasut nakorsaqarfiata nittartagaata linkia

Namminersorlutik Oqartussani uumasut nakorsai oqaloqatiginiaraanni tamanna akeqanngilaq.

Qimmeq nakorsaammik pisariaqartitsissappat nakorsaatip tunniutinnginnerani tamanna akileqqaarneqassaaq.

Nakorsaatip akia assigiinngisitaartuuvoq, apeqqutaavorlu qimmip angissusia. Qimmit anginerit nakorsaat annertunerusoq pisariaqartittarpaat, taamaammallu immaqa nakorsaatit poortat marluk pisariaqartinneqassapput.

• Qimminut inersimasunut qumaajaatit (qimmimut inersimasumut ataatsimut 25 kg. sinnerlugu oqimaassusilimmut): 70 kr.
• Qimmit piaraannut qumaajaatit (qimmit piaraannut sisamanut 10 kg. sinnernagu oqimaassusilinnut): 50 kr.
• Antibiotika: 160 kr.
• Nipaallisaatit: 30 kr.
• Timminnermi nakorsaatit: 140 kr.
• Nakorsaatit allat: 30-125 kr.