Avannaata Kommuniani ingerlatsivinni corona pillugu upalungaarsimanermut pilersaarusiaat pisut aallaavigalugit tulluarsarneqalerput aammalu maleruagassat allat nutarsarneqarlutik, taamaalu Naalakkersuisut maleruaqqusaannut nutaanut ullumi marlunngornermi atuutilersunut tulluarsarneqarlutik. Oqariartuut tamanna ullumi marlunngornermi ualikkut ataatsimiinnermi saqqummiunneqarpoq, ataatsimiinnermilu peqataapput borgmesteriugallartoq Jens Ole Nathanielsen, pisortaqatigiit, illoqarfinni sullissivinni aqutsisut aammalu ingerlatsisut marlussuit.
Innutaasut inini kikkunit tamanit orninneqarsinnaasuni aammalu assartuutini, soorlu bussini, taxani, timmisartuni kiisalu umiatsiani aamma umiarsuarni ilaagunik anersaartuutitigut illersuuteqarnissaat oqariartuutit pingaarnersaraat.
Ataatsimiinnermi peqataasut nassuerutigaat, anersaartuutinut illersuutit Avannaata Kommuniani amigaatigineqaleratarsinnaanerat pissutigalugu sullissivinni tamakkuninnga tunioraasoqassanngitsoq. Taamaattorli utoqqarnut allanullu Naalakkersuisut maleruaqqusaat pillugit tusagassiuutitigut malinnaanngeratarsinnaasimasunut atugassianik kommune saqqumititaqassaaq.
Nunatsinni Nakorsaaneqarfimmit ilisimatitsissutigineqartutuut kommunimi sulisut innuttaasunik sullissinerminni anersaartuutitigut illersuuteqartariaqanngillat. Sulisulli kommunip assartuutai atorlugit innuttaasunik sullissisut anersaartuutitigut illersuuteqassapput.
Avannaata Kommuniani utoqqaat illui maannamuugallartoq ammatiinnarneqassapput, pulaartulli pisortaqarfinni maleruagassat allat assigalugit anersaartuutitigut illersuuteqassapput.
Maleruagassat sukatikkat coronamik tuniluunnerni pisut aallaavigalugit allanngortinneqarsinnaapput.
Allattoq: Káte Hansen, khan@avannaata.gl