airplanebooksbriefcase business cogs cross election entertainment fish house law lockmedicalpeopleselfservices socialtax

Milan angusivoq

Milan Reimer Ilulissani Atuarfik Mathias Storch-imi 10. klassimi atuartuuvoq. Ukioqatini arlallit peqatigalugit projektimik sammisaqarnermi soraarummeeqqammerpoq.
18. februar 2022

Milan Reimer nukillaarnermik nappaateqarpoq tusaaniarneralu sakkukilluni. Taamaattorli projektilerineq pillugu soraarummeernissaq uniffiginagu ingerlappaa.

Ilaqutai ilinniartitsisuilu klassip silataani erfalasulerlutik katersuussimapput. Milan Reimerip sammisaq qatserisartoqarfik toqqarsimavaa tassani oqaluttariarsornermi ilinniartitsisunut censorinullu saqqummiivoq. Atuartitaanermut susassaqarfimmit fagchefi Ilinniartitaanermullu Ingerlatsiviup pisortaa kiisalu atuarfiup aqutsisui ulloq pingaartorsiorfiusoq nalliuttorsiorfigalugu peqataaffigaat.

”Ullut tallimat ingerlaneranni ulapissimavugut, Milanip projektiliaanut atorsinnaasatsinnik paasissutissanik katersilluta, qatserisarfimmiippugut katersugaasivimmiillutalu”, Lena Ravn Davidsen Milan-imut tapersersortitut ilinniartitsisuusoq oqaluttuarpoq. Milan-p oqaluttualiaa aamma allanut isumassarsiorfiusinnaasoq tapersersortitut ilinniartitsisua oqaluttuarpoq. ” Atuarfiup iPadia annertugaatsiartumik atorsimavarput, atornerani Milan-p assut iluaqutigisimavaa, tassami allannissaq ajornakusoortuummat, allatut eqqarsarluta qanoq iliorutta Milan-p ajornannginnerpaamik suliaqarnissaa pillugu paasiniaasimavugut”, Lena Ravn Davidsen oqaluttuarpoq. ”Tamatigut peqataatinneqannginneq iluaqutaajuaannarneq ajorpoq, Milanimmi tamanna sapinngulluinnarpaa, atortorissaarutit ikiorsiullugit, assorsuarlu uagut tamanna tulluusimaarutigaarput”, nangilluni oqaluttuarpoq.

”Suliara C-imik pissarsiaqaatigaara , pissangasimaqaanga, kisianni massakkut nuannaarpunga”, Milan  tulluusimaaqaluni oqaluttuarpoq. Atuarfiup silataani erfalasoq amua soraarummeernerlu naammasimmat eqqissisinnaanngorluni.