Avannaata Kommuniata 2024-imut missingersuutai Kommnalbestyrelsimi amerlanerussuteqarluartunit akuersissutigineqarput.
Missingersuutit naapertorlugit ukiumi tulliuttumi kommunip aningaasaqarnera misinnartumik nukittorsarneqassaaq.
2024-imi missingersuutini kisitsisit anginerit tassaapput isertitassatut naatsorsuutigoineqartut 1.114 mio. kr.-it, aningaasartuutissallu 1.036 mio. kr.-it. Taamaalilluni ukiup naanerani sinneqartoorutit 69 mio. kr.-iussapput, taamaalillunilu karsimi uninngasuutit patajaannerulissallutik kommunilu aningaasarissaarnerulerluni.
Missingersuutit isumaqatigiinniutigineqarnerini politikkikkut pimoorullugu piumasaqaataasimavoq kommunip aningaasaqarnerata nukittorsarneqarnissaa. Tamanna 2024-imut missingersuutitigut anguneqarpoq, tassa ukiup ataatsip ingerlanerani karsimi uninngasuutit 78 mio. kr.-nik amerleriaateqassallutik. 2024-imut missingersuutit suli pisariaqartippaat aningaasartuutit tamarmik sukannersumik aqunneqarnissaat – ilanngullugit aningaasarsiat. Naatsorsuutigineqarpoq 2024-ip ingerlanerani sulisut suli ikileriaqqinnissaat, assersuutigalugu atorfinnik qimanneqartunik inuttaliisoqaqqittannginneratigut.
”Nuannaaqaanga tulluusimaarlungalu, maanna missingersuuteqaleratta, misinnartumik aningaasaqarnerput nukittoriartillugu kommunitsinni ineriartortitseqqinnissatsinnut periarfissagissarput pitsaanerulersillugu”, Avannaata Kommuniani borgmesteri Palle Jerimiassen (AI) oqarpoq.
Kommunimut akileraarut allannguuteqarani 28 %-iuinnassaaq.
Ileqqoq malillugu ukiumi tulliuttumi akileraarutip procentia
taasissutigineqarmat kommunalbestyrelsimi ilaasortat tallitik kivillugit
taaseqataapput.
Missingersuutitigut qulakkeerneqarpoq ukiuni tallimani aggersuni eqqagassalerinerup annertuup piviusunngortinneqarnissaa, avatangiisit mianeralugit eqqagassanik suliaqarfiusussaq. Missingersuutitigut aamma kommunip aningaasaqarnera ima inissinneqarpoq, aningaasanik attartorsinnaaneq periarfissinneqarluni, pingaartumik ineriartortitsinermut suliniutinut atugassanik, assersuutigalugu sanaartorfissagissaanermut.
2023-ip aasaanerani naatsorsuutaanngitsumik suliassanut arlalinnut aningaasanik atuisoqartariaqarsimavoq, Avannaata Kommunialu piffissap ilaani aningaasanik tigoriaannarnik atugassaqarumalluni aningaaserivimmi attartortariaqarsimavoq, peqatigitillugulu ingerlatsivinni tamani annertuumik sipaarniarneq ingerlattariaqarsimallugu.
”Aningaasaqarnerup ilorraap tungaanut saateqqinniarnera suliarujussuusimavoq. Qinikkat suleqatikka ataatsimoorlutik kommunimut innuttaasunullu iluaqutissaq siunertaralugu aaqqiissutissanik nassaarniaqataasimanerinut qujangaarpunga, taamatuttaarlu qaammatit arfinillit ingerlanerini sulisorisatsinnut iluarsiissutissanik sipaarutissanillu ujaasillutik suliarujussuarmik kivitsisimanerinut qujangaarlunga” Palle Jerimiasssen oqarpoq.
Kommuni 2023-imi aasaaneraniit Namminersorlutik Oqartussanit nakkutigineqarsimavoq. Naatsorsuutigineqarpoq maannakkut aningaasaqarnikkut pissutsit nutaat atuutilernerisigut nakkutigineqarneq pisariaarutissasoq.
Ilinniartitaaneq piginnaanngorsaanerlu ukkataralugit
Missingersuusiornerup nalaani sammisat pingaarnerit ilagisimavaat Avannaata Kommuniani sulisussaaleqineq. Suliffeqarfiit namminersortut maanna annertuumik sulisussaaleqilereernikuupput ukiunilu tulliuttuni sulisussaaleqinerup suli annertuseriarnissaa ilimagineqarpoq. Sulisussaaleqineq taamaallaat suliffissaaleqisut amerlassusiannit aaqqinneqarsinnaanngilaq. Kalaallit Nunaanni Naatsorsueqqissaartarfimmit kisitsisit takutippaat kommunimi tamarmi september 2023 suliffissarsiortut taamaallaat 68-iusimasut. Sulisitsisut akornanni naatsorsuutigineqarpoq pisariaqartitsineq suli annertunerujussuussasoq.
”Sulisorisatta ilaat iperarumavagut sulisitsisuni namminersortuni suliffissaqarmata. Tamanna innuttaasunut inuussutissarsiutinillu ineriartortitsinermut iluaqutaassaaq. Taamaattumik suli isiginiartariaqarparput kommunitta iluani suliassat pitsaanerusumik qanoq aaqqissuussinnaanerlutigit” borgmesteri oqarpoq.
Nunaqarfiit ilaanni suliassaqarfiit ilaanni sulisoqarpoq ullormut akunnerni marlunni sulisartunik. Politikkikkut kissaatigineqarpoq suliffeqartoqarnissaa inuussutigineqarsinnaasumik. Tassami aamma akisuneruvoq sulisunik sisamanik ullormut akunnerni marlunni sulisartunik sulisoqarneq, ataatsimik ullormut akunnerni arfineq pingasuni sulisoqarnermut sanilliullugu.
”Taamaattumik aaqqiissutissat isiginiartariaqarpagut innuttaasut akileraarutaannik pitsaanerpaamik atorluaanerunissamik qulakkeerinnissinnaasut aammalu suliffiit imaqarluartut, atorfinnilu piffissami tamakkiisumik suliffiusuni piginnaanngorsaanerit aqqutigalugit suliffiit pitsaanerulersinnissaannut ineriartorteqqinneqarnissaat qulakkeerumallugu.” Palle Jerimiassen oqarpoq.
Avannaata Kommuniani inuussutissarsiornermut ingerlatsiviup kommunimi inuusuttut 15-niit 29-it angullugit ukiullit, meeqqat atuarfiannit qimagutereersimasut, misissuiffigisimavai. Inuusuttunit 2.168-iusunit annertuumik siaanganeqarpoq: Ilai suliamik ilinniagaqalersimapput, ilaat aalisarnerup iluani suliaqarput, ilaat naartunerminni sulinngiffeqarput siusinaartumilluunniit pensionisiaqalersimallutik. Kisianni inuusuttut 234-it attavigineqarsinnaasimanngillat, taamaattumillu sulerineri sumilu najugaqarneri paasineqarsinnaasimanatik.
”Taakku aamma nanisariaqarpagut. Inuusuttutut innuttaaguit isumaginninnerup iluani aamma pisinnaatitaaffeqarput ikiorneqarnissamut, suliffeqarnissamut imaluunniit ilinniagaqarnissamut, inuusuttullu siunissagissaarnissaannik qulakkeerukkusuppagut,” Palle Jerimiassen oqarpoq.
Kommunimi Majoriaq assigiinngitsunik pilersaaruteqarpoq inuusuttut taakku sumiissusersinissaat pillugu. Siunertaavoq assersuutigalugu suliffinnik sungiusarneq aqqutigalugu inuusuttunik assersuutigalugu atuarfinnut ingerlaqqiffiusunut kajumissuseqalersissallugit imaluunniit ineriartuutigineqarsinnaasunik suliffeqalersissallugit.
2024-imi sanaartornermut aningaasaliissutit
Avannaata Kommuniani 2024-imut sanaartornermut missingersuutaa imaqarneruvoq suliassanik ingerlareersunik 2022-imi 2023-imilu aallartinneqarsimasunik.
Sanaartukkat ingerlareersut tassaapput ulluunerani paaqqinnittarfiit, atuarfiit, sanaartorfissagissaanerit, sunngiffimmi ornittakkat, illut sulliviit, inissiat, aqqusernit, ilinniartitsisut illussaat il.il.
Ukiuni tulliuttuni tallimani kommunimi eqqagassalerinermut 195 mio. kr.-it angullugit atorneqassapput, avatangiisit mianeralugit eqqagassalerineq atuutsinneqalissalluni kommunimi nunaqarfinni illoqarfinnilu.
Aammattaaq atortulersuutit upalungaarsimanerlu aningaasaliiffigineqarput.
Sanaartugassanut aningaasaliissutit agguataarneqartarnerat pisarpoq illoqarfinni nunaqarfittaanilu inoqqortussuseq aallaavigalugu.
2024 aallarnerfigalugu, matumalu kingorna, sanaartugassanut aningaasaliissutit atunngitsoorneqartut kommunip sanaartornermut aserfallatsaaliuinermullu aningaasaateqarfianut toqqaannartumik nakkartinneqartalissapput, taanna 1. januar 2024 pilersinneqassaaq.
Avannaata Kommuniata 2024-imi missingersuutaa tamakkiisoq 24. november 2023 Kommunalbestyrelsip ataatsimiinnerani imaqarniliami pkt. 121-mi aamma pkt. 122-mi takuuk Oqaluuserisassat imaqarniliallu (avannaata.gl)