Uummannap eqqaani silaannakkut qulimiguulimmik ilaasunik angallassineq, piffissami sivitsortumi, annertoorujussuarmik kinguaattoorfiusaqattaarpoq. Qulimiguullip tamaani atorneqartup ataavartumik teknikkikkut ajoquteqaqattaarnera pissutaatinneqarpoq. Februarilli aallartinneraniit ilaasut angalaniarnerminni assut kinguaattoorunneqaqattaarput.
Angalaniartorpassuit annertuumik eqqornerlunneqaqattaarput, aamma tamakkununnga ilaapput nakorsiarlutik suliaritinniartut arlalippassuit. Kinguaattoortoqartillugu utaqqiinnartariaqarput. Kiisalu angalaniaraluarlutik kinguaattoortut ilarpassui nerinissamut unnuinissamulluunniit periarfissanik innersuunneqarneq ajorput.
”Utoqqaat napparsimasullu Nuummut angalaniaraluarlutik aallarsinnaajunnaartarnerat akuerineqarsinnaanngilaq. Allaammi sapaatip akunneranik kinguaattoornerit pisarput. Pitsaanerusumik kiffartuussisoqartariaqarpoq. Namminersorlutik Oqartussat aamma Air Greenlandip kiffartuussinissamik isumaqatigiissuteqarput, innuttaasut kiffartuunneqarnissaat pillugu, tunulliunneqarnissaat pinnagu”, Borgmester Palle Jerimiassen oqarpoq.
2018-imiilli maannamut Uummannami innuttaasut kiffartuussinermi ajorseriaaterpassuit malugisimavaat. Air Greenland-ip qulimiguuliutaa Airbus H115 ulluinnarni atorneqarpoq, nunaqarfinnukartaatitut.
Qulimiguulik teknikkikkut ajornartorsiuteqaleraagat angalaniartut eqqorneqartarput, napparsimasut, allakkat nassiussallu allat kinguaattoortinneqartarput, innuttaasullu ilarpassuisa akiligassatik piffissamik kingusinaarlutik tigusarpaat.
”Uummannami innuttaasut kiffartuussinerlunnermik misigisaqartuarnissaat ajorluinnarpoq. Qulimiguullit nutaat atorneqalermata paasitinneqarpugut suna tamarmi pitsaanerulissasoq. Ajorseriaannarnermik malitseqarput, Uummannamilu nunaqarfiinullu taamaallaat ilaanni sapaatip akunneranut ataasiaannarluni qulimiguulik tikittarpoq.
Avannaani innuttaasut angalaniarnikkut ajorluinnartumik sullinneqarnertik misigisaqarfigaat”, borgmester Palle Jerimiassen oqarpoq.
”Ilungersorlunga sakkortuumik Namminersorlutik Oqartussat aamma Air Greenland kaammattorpakka Uummannap eqqaani ilaasunik angalaniarnikkut pissutsit qanoq iliuuseqarfigeqqullugit. Paasisinnaasarparput silarluk pissutigalugu angalaniarneq eqqorneqaraagat, kisiannili matumani teknikkikkut ajutoortoqaqattaarnerit amerlavallaaqaat, inuppassuillu eqqornerlunneqartarput, ukiuutillugu silaannakkut angallassineq pisariaqartittarmassuk. Avannaata Kommuniani borgmester Palle Jerimiassen taama oqarpoq.
Allattoq: Borgmester Avannaata Kommunia, Palle Jerimiassen, (AI)