Taamatut nipilimmik oqaaseqarpoq Nunalerinermut, Imminut pilersornermut, Nukkissiornermut Avatangiisinullu Naalakkersuisoq, Kalistat Lund.
”Naatsorsuutiginngilara Kalistat Lund sallussasoq, akunnermi apeqquteqarfissami oqarami, kommunimi inoqarfiit ilaanni utaqqiisaasumik eqqakkanik ikuallaasinnaatitaanissamik kommunip kissaateqarnera akuerissallugu piareersimalluni.” taama oqarpoq Palle Jerimiassen, (AI), Avannaata Kommuniani borgmesteri. ((7) Facebook)
Avannaata Kommunia piffissami sivitsortumi Nunalerinermut, Imminut pilersornermut, Nukissiornermut Avatangiisinullu Naalakkersuisumik ilaatigut sakkortuuliorfiusumik attaveqartarsimavoq – ilaatigut atorfilittatigoortumik aammali Kalistat Lund-ip maani Ilulissani november 2023-ip kommunip allaffiani ataatsimeeqatigineratigut.
”Taamaattumik nuannaarutingalugu tupaallaatingaara, Inatsisartuni ataatsimiinnermi Naalakkersuisut Inatsisartuni aperineqarsinnaaneranni tusangara. Alloriarneruvoq uagutsinnut assut pingaarutilik, tassa utaqqiisaasumik inoqarfiit ilaanni inoqarfinni ammasumik ikuallaasinnaatitaanissarput, kommuni tamakkerlugu eqqagassalerinermik pilersaarupput annertooq tamakkerlugu piviusunngortinnissaata tungaanut.” taama oqarpoq Palle Jerimiassen.
Borgmesteri erseqqissaavoq, Avannaata Kommuniani kommunalbestyrelsip assut pingaartimmagu, 2030-ip tungaanut eqqagassalerineq pillugu pilersaarut aqqutigalugu, kommunimi innuttaasunut tamanut eqqagassalerinerup tungaatigut pitsaasumik kiffartuussisoqarnissaa.
Eqqagassalerinermut pilersaarummi allassimavoq eqqagassat qanoq isumagineqassanersut massakkut siunissamilu. Tamanna ilaatigut qulakkeerniarneqassaaq atoqqiisarnerup annertusarneratigut. Kingullertigut kommunip eqqagassalerinermut pilersaarutaanut tapertaliunneqarpoq suleriaasissamut pilersaarut, tassuunakkut takuneqarsinnaalerluni, eqqagassalerinermut pilersaarutip immikkuualuttortai pillugit pingaarnersiuineq siunnerfiillu qanoq anguneqarniarnersut.
Eqqagassalerinermut pilersaarummut peqatigitillugu, maannakkut atorfissaqartinneqarpoq nunaqarfinni eqqakkat ammasumik ikuallattarneqarsinnaanissaat, tamaani ukiup ilarujussuani sikuusarnera pissutigalugu eqqakkat imaatigut aallarussuunneqarsinnaaneq ajormata.
”Naalakkersuisup qinnuteqaaterput paasissutissallu tamaasa uagutsinnut piniarnikuusatik tigoreernikuuat, apeqqutaaginnalerunarporlu ullualunnguit qaangiuppata ammasumik ikuallaasinnaanitsinnut akuersissutip uagutsinnut apuunnissaa.” taama oqarpoq Avannaata Kommuniani borgmesteri, Palle Jerimiassen, (AI).
Qilanaarnerarpoq, Avannaata Kommuniani illoqarfinni nunaqarfinnilu eqqagassalerineq pillugu, Nunalerinermut, Imminut pilersornermut, Nukissiuuteqarnermut Avatangiisinullu Naalakkersuisumik inerititaqarfiusumik oqaloqatigiittarnitik maanna pitsaasumik angusaqarfiusumik naammassineqarnissaannut.