Ilulissani mittarfimmut nutaamut immikkut ittumik aalajangersakkanut tunngatillugu kommunip pilersaarutaanut tapiliussassamut nr. 62-imut siunnersuut, tamanut tusarniutigineqarluni saqqqummiunneqarpoq: ulloq 10.04.2018-imiit ulloq 22.05.2018 tikillugu.
Kommunip pilersaarutaata tapiata siunertaa:
Ilulissani mittarfiup piusup eqqaani, mittarfiup tallissutissaanik sanaartortoqartussaavoq. Suliniutip kingunerissavaa, mittarfimmik nutaamik 2.200 meter-isumik, timmisartut uninngasarfissaannik immikkoortumik, aqqusinerngup tallissutissaanik kiisalu mittarfiup illorsuartassaanik aamma kiffartuussinermi illunik, napasuliamik mitsitsisartoqarfiusumik kiisalu biilinut unittarfinnik sanaartorneq.
Ilulissani immikkoortortamut piusumut pilersaarusiornerit nutartikkat nutaat, immikkoortortamut nutaanik immikkut ittumik aalajangersakkanik ilaqarput, matumani teknikkimut atortulersuutinik, mittarfimmik angisuumik atortulersuutinik aamma aqqusinermik nutaamik ilaqartut sananeqarnissaannut nunaminertamik atugassiinissaq siunertarineqarpoq.
Kommmunip pilersaarutaata tapiatut siunnersuut sapaatip akunnerini arfinilinni sivisussuseqartumik tusarniutigineqassaaq. Piffissami tassani kikkulluunniit – innuttaasut, suliffeqarfiit, ingerlatsiviit, peqatigiiffiit allallu – akerliunerminnik, oqaaseqaatinik kiisalu allannguutissatut siunnersuutinik saqqummiussaqarsinnaapput.
Tusarniaanermi akissuteqaatit kommunimut toqqaannartumik kommunimi pilersaarutip nittartagaa atorlugu nassiussinnaavat. Aamma tassani ilanngussassatit kakkiussinnaavatit. Taamaattorli suli akissuteqaatit najukkanni Sullissivimmut imalunniit Kommunimut nassiussinnaavat.
Tamanut saqqummiussinerup ingerlareernerata kingorna, akerliliissutaasimasinnaasut aamma allannguutissatut siunnersuutaasinnaasut Kommunalbestyrelsip oqaluuserissavai, tassanilu kommunip pilersaarutaanut tapiliussaq inaarutaasumik akuerineqassanersoq aalajangiiffigissavaat.
Tusarniaanermut akerliunissamut pissutissaqaruit imaluunniit oqaaseqaatissaqaruit, taakku kingusinnerpaamik kommunimit tiguneqareersimassapput ulloq 22.05.2018.