Avannaani qaleralinniarlutik umiatsiaararsorlutik aalisartut paasilluarsinnaavakka ulluni makkunani erloqimmata siunissarlu pillugu ernumammata.
Qaleralinniarneq uneqattaartumik ingerlanneqalerporaasiit tassanilu eqqungaanerpaaupput aalisartut umiatsiaararsortut avannaamiut aqutsisoqarfimmi 47-mut allagartallit.
Aqutsisoqarfik 47-mut allagartaqaraanni taava aqutsisoqarfinnut allanut qaleralinniarsinnaanngillat illuatungaanili aalisartut aqutsisoqarfik 46-meersut aqutsiveqarfimmut 47-mut ajornaateqanngitsumik aalisariarsinnaallutik akuersissuteqarunik, pisassallu aqutsiveqarfik 47-mi nunguppata 46-rormiut aqutsiveqarfik 46-mut aalisariarsinaapput uagullu aalisartugut avannaamiut mattussaallutik. Tamanna immikkoortitsineruvoq assullu tamatsinnut avannaamiunut paasiuminaappoq akuersaarneqarsinnaananilu.
Ingerlariaaseq tamanna aamma massakkut Nalunaarutissami nutaami ingerlatiinnarniarneqarpoq, tassa aqutsiveqarfik 47-rormiut aqutsiveqarfimminnut pituttungaassapput, aqutsiveqarfinniit aallaminngaannersulli aqutsiveqarfik 46-meersut massakkut aqutsiveqarfik 47-mut akuersisuteqartut aggerlutik aalisarsinnaassapput. Taamaasilluni allanngortoqarani massakkutut ingerlaneq ingerlaqqittussanngorpoq avannaamiut aalisartut immikkoortinneqarlutik.
Nalunaarummi nutaami, siornatigut kukkussutaasimasoq, taamatummi taarusuppara, tassa aqutsiveqarfinniit allaneersunut aqutsiveqarfik 47-mut akuersissutinik tunioraasimaneq aaqqiivigineqartariaqarpoq marlunnut aqutsiveqarfinnut akuersissuteqarneq atorunnaarsillugu aamma siunissami taamatut pisoqarsinnaaunnaarsillugu.
Aappaattut paasiuminaatsippara sooq Qeqertarsuup tunuani aqutsiveqarfiup killeqarfia kujavarlugu aaqqinniarneqarnersoq taamaasilluni massakkut killeqarfiusup kujataatungaaniitsut massakkut aalisarfiusumut tattoqisaaffioreersumut suli amerlanerit aalisariarsinnaanissaannik ammaasoqassammat, naak biologit aalisartullu namminneerlutik oqariartuutigisaraluaraat Diskobugt-mi qaleralinniarlutik aalisartut amerlavallaartut aamma qaleralinniarluni aalisarneq annertuallaamik ingerlanneqartoq. Massakkut killeqarfiusup allanngortinneqannginnissaa piumasararaa, tassani tunngavilersuutigalugu piuaannartitsinissaq aalisarfiullu illersorneqarnissaa eqqarsaatigalugu.
Taamaattumik, sakkortungaluarpoq oqariartuutigissallugu, piumasaraara aqutsiveqarfinniit allaniit aalisariartartut aqutsiveqarfimmut 47-mut aalisariartarnerat unitsinneqassasoq aqutsiveqarfimmi 47-mi najungaqartunit aalisarneq ingerlanneqassammat.
Pisassat, massakkut ukiup sinneranut sinneruttut, Avannaata kommuniani najungalinnit aalisarneqarnissaat aaqqiivigineqartariaqarpoq ukiummi sinneranut massakkutut aalisarneq ingerlaannassappat novemberimi decembarimilu Diskobugt-mi Uummannamilu umiatsiaararsorluni qaleralinniartoqanngitsorsinnanera aarlerinarmat, massakkumi taamanikkussamut pisassat aalisarneqarmata, avannaani najungaqartut aalisartut inuussutissarsiortuarnissaat qulakkeerniarlugu taamatut aaqqiisoqartariaqalerpoq.
Avannaata Kommuniani aalisarneq pingaarnertut inuussutissarsiutigaarput aningaasarsiutingalugu aamma siunissami suli taamaattuarnissaa naatsorsuutingaarput. Ilaqutariippassuit inoqarfinni tamani aalisarneq ingerlatarivaat kinguaariillu arlariit kisiat aningaasarsiutigalugu tamannalu aaqqissuusseqqinnermi isiginiarneqartariaqarluinnarpoq.
Avannaata Kommunia sinnerlugu inuulluarit
Palle Jerimiassen
Borgmesteri