airplanebooksbriefcase business cogs cross election entertainment fish house law lockmedicalpeopleselfservices socialtax

Inatsisartunut qinersisinnaatitaaneq

Inatsisartunut qinersinissamut qinersisartut allassimaffianni allassimassaatit.
1. marts 2021

Qinersisartut allassimaffianni ilanngunneqassagaanni piumasaqaataapput:
a) danskisut innuttaassuseqarnissaq,
b) kingusinnerpaamik ullormi qinersiviusumi 18-inik ukioqalereersimanissaq,
c) ullormi qinersiviusumi Kalaallit Nunaanni aalajangersimasumik najugaqarnissaq, aamma qinersinissaq sioqqullugu sivikinnerpaamik qaammatini arfinilinni Kalaallit Nunaanni aalajangersimasumik najugaqarsimanissaq
d) oqartussaassuseerutsinneqarsimannginnissaq
Taamaattoq immikkut piumasaqartoqarneratigut qinersinermut siulersuisut inuit ilaat qinersisussat allassimaffiannut ilanngutititsisinnaapput. Tamatumani pineqarput inuit aalajangersimasumik najugaqarnissamik c)-mi piumasaqaammik eqquutsitsisimanngitsut qinersisussat, tak. § 24.
Matumani pineqarput inuit, taakkulu inooqatitut aapparisaat piumasaqaatinik siuliini taaneqartunik eqquutsitsisimappata, pigallartumik Kalaallit Nunaata avataani najugaqartut a)-d):
1. Inuit ilinniagaqarlutik Kalaallit Nunaata avataaniittut
2. Inuit peqqinnissamut tunngasunik pissuteqarlutik Kalaallit Nunaata avataaniittut
3. Inuit Kalaallit Nunaanni qinigaallutik folketingimi ilaasortatut suliaqarnerminnut atatillugu Danmarkimiittut
4. Inuit Namminersorlutik Oqartussanut sinniisuullutik Kalaallit Nunaata avataaniittut
5. Inuit Kalaallit Nunaata avataaniittut aammalu Kalaallit Nunaannut attuumassuteqarnikkut 1)-4)-mi taaneqartunut sanilliunneqarsinnaalluinnartut.
Taamaattoq inuit inooqatitullu aapparisat taaneqartut qinersisussat allassimaffianni aatsaat ilanngunneqarsinnaapput nuunnginnerminni sivikinnerpaamik katillugit ukiuni marlunni Kalaallit Nunaanni inuit aqqisa nalunaarsorsimaffiini allassimasimagunik. Katissimanatik inooqatigiittut aappariillutik inooqatigiittunut sanilliunneqassapput aallannginnerminni aappariinnermut assingusumik inooqatigiilersimagunik.
Kalaallit nunaanni aalajangersimasumik najugaqartuusimanngikkuit, kisiannili qulaani piumasaqaatit naammassisimallugit, taava taasisinnaatitaanerit attatiinnarniarlugu taasisinnaasut allattorsimaffiannut ilanngunneqarnissat qinnutigissavat. Taamatut iliorsinnaavutit immersugassap uuma immersorneratigut, taannalu uunga nassiunneratigut avannaata@avannaata.gl

Qinigassanngortittunik nalunaarutiginninneq
Qinersinermut inatsimmi § 13-17 naapertorlugit inuit qinersisinnaatitaasut Inatsisartunut qinigassanngortissinnaapput partii sinnerlugu, ataasiakkaatut imaluunniit kattusseqatigiinni ataasiakkaatut.


Partii sinnerlugu qinigassanngortittut

Partiit qinigassanngortittut pillugit nalunaarutaat kommunimi qinersinermi siulersuisunut (najukkami taasinermi aqutsisumuunngitsoq) kingusinnerpaamik ulloq 16. marsi nal. 12.00 tunniunneqassapput.
Partii ataaseq amerlanerpaamik Inatsisartut amerlassusaasa marloriaataanik qinigassanngortitsisinnaavoq. Tassa imaappoq, partiit tamarmik immikkut amerlanerpaamik 62-inik qinigassanngortitsisinnaavoq.
- Inatsisartunut qinersinermi partiit qinigassanngortittut pillugit nalunaarutaat: Immersugassaq aajuk.


Partiip avataani qinigassanngortittut

Ataasiakkaatut imaluunniit kattusseqatigiinni ataasiakkaatut qinigassanngortittut pillugit nalunaarutit kommunimi qinersinermi siulersuisunut (najukkami taasinermi aqutsisumuunngitsoq) kingusinnerpaamik ulloq 16. marsi nal. 12.00 tunniunneqassapput. Partiip avataani qinigassanngortinniaraanni qinigassanngortitsillutik atsiortut ikinnerpaamik 40-t pissarsiarineqassapput.
Inatsisartunut qinersinermi partiit avataani qinigassanngortittut pillugit nalunaarutaat: Immersugassaq aajuk.


Partiimik nutaamik nalunaarutiginninneq

Paartiit ullormi qinersinissamik suaarutiginninnermi inatsisartuni ilaasortaatitaqanngitsut, qinersinermullu qinigassanngortitsiniartut qinersisartunik nalunaarutigineqartunik Kalaallit Nunaanni Inatsisartunut qinersisarneq pillugu Inatsisartut inatsisaani § 12-mut Inatsisartut qinersisarneq pillugu inatsiseq) naammassinnittut 936-nik katersisimassapput.
Inatsisartunut qinersisarneq pillugu pillugu inatsiseq, § 12 imm. 4 naapertorlugu, partiimik nalunaarutiginninneq qinersisartut partiimik nalunaarutiginnittut uppernarsaatitut allagaannik ilaqartinneqassaaq. Uppernarsaatitut allakkami ilanngullugit nalunaarutigineqartassapput qinersisartut aqqi tamakkiisut, ullut inunngorfii sumilu najugaqarneri aammalu qinersisartunit namminernit atsiugaallutillu ulluligaasimassallutik. Taakkua saniatigut uppernarsaatitut allakkani ilanngullugu allassimassaaq qinersisartut Inatsisartunut qinersisinnaanermut piumasarineqatunik naammassinnissimaneri pillugu inuit aqqinik nalunaarsuiffimmi pineqartumi pisortaasup uppernarsaataa atsiugaq.
Uppernarsaatiitut allakkat nunaarutiginninneq ukiumik ataatsimik sinnerluguluunniit sioqqullugu allanneqarsimasut naatsorsuutigineqarsinnaanngillat. Taamaapportaaq partii ataaseq sinnerlugu nalunaarutiginninnermi qinersisartut uppernarsaatitut allagaanut tunngatillugu.
Partiimik nutaamik nalunaarutiginnilluni tunniussisoqassaaq kingusinnerpaamik marlungornermi 2. marsi 2021-mi.
- Partiimik nutaamik nalunaarutiginninneq :Immersugassaq aajuk.


Inatsisartunut qinigassanngortittunik aamma partiinik nutaanik nalunaarutiginninneq kommunimi qinersinermi siulersuisunut tunniunneqassapput. Nalunaarutiginninnerit pappialangorlugit tunniunneqarsinnaapput imaluunniit email-ikkut uunga nassiunneqarsinnaapput avannaata@avannaata.gl

Qinersiviit
Avannaata Kommuniani qinersiviit aamma taasinermi aqutsisunik nalunaarsuiffik uani takusinnaavat: Allattorsimaffik aajuk.