airplanebooksbriefcase business cogs cross election entertainment fish house law lockmedicalpeopleselfservices socialtax

Eqqaavilerisoq dronningip nersornaasiuttagaanik nersornaaserneqartoq

Jakob Gundet eqqaavilerisutut kommunimi suli sulisoq dronningip nersornaasiuttagaanik siilviusumik nersornaaserneqarpoq.
21. juni 2021
[Borgmesterip Palle Jerimiassenip Jakob Gundel dronningip nersornaasiuttagaanik saqqarmiulerpaa.]
Erinarsoqatigiittoqarpoq.]
Eqqaavilerineq 1979-imi marsip 15-iani kommunimit ingerlanneqalermat Jakob Gundel eqqaavilerisutut kommunimi sulilerpoq.

Jaaku suliaqarfimmi tassani katillugit ukiuni 44-ni sulisimavoq. Ukiuni siullerni marlunni eqqaavilerisumi namminersortumi sulisimavoq, tamatumalu kingorna suliaq tamanna kommunimi ukiuni 42-ni aallussimavaa. Tamannalu tunngavigalugu borgmesterimit dronningi sinnerlugu nersornaammik tunniussisumit oqaaseqarfigineqarpoq.

- Ukiut 40-t kommunimi eqqaavilerinermi suliaqartutut sulineq qaqutigoortuuvoq, Jaakulli suliassaq taamanerniit aalajaalluinnarluni tunniusimallunilu ingerlattarsimavaa, naak atukkat ilaatigut imaannaasarsimanngikkaluartut. Suliassap inuiaqatigiinni pingaaruteqarluartup pinngitsoorneqarsinnaanngitsullu ukiuni 40-ni ingerlassimaneranut Jaaku kommunimit qutsavigaarput. Jaaku, pilluarit aamma ilaqutaasut tamassi pilluaritsi, Palle Jerimiassen Avannaata kommuniani borgmesteri ilaatigut oqarpoq.

Jaakup ullumikkut 61-inik ukioqartup eqqaavilerisutut sulinini nuannarigamiuk taamatut suliinnarnissani naatsorsuutigaa.

Dronningip nersornaasiuttagaa siilviusoq pisortaqarfinni ataavartumik ikinnerpaamik ukiuni 40-ni atorfeqarsimasunut nersorinninniutitut tunniunneqarsinnaavoq.

Nersornaammik tunniussinermi borgmesterip oqalugiaataa uani aaneqarsinnaavoq.

Allattoq assiliisorlu: Káte Hansen, khan@avannaata.gl


Jakob Gundel dronningip nersornaasiuttagaanik saqqarmiulerluni.