Taamaammat Ilulissani innuttaasut akiuussutissinneqarnissaannut peqqinnissaqarfik aamma Avannaata Kommunia pilersaaruteqarput.
- Ilulissani inuit 1000-it missaanniittut – pingaartumik inuusuttut - suli siullermeerutaasumik kapitissimanngillat. Siullerpaamik kapitinnissamut pingasunngornermi juulip 14-iani nal. 13.00-imiit 18.00-ip tungaanut Piorsarsimassutsikkut illorsuarmi Sermermiuni neqeroorutiginiarparput. Taava Ilulissani aggustimi kingullermeerutaasumik kapueriarutta illoqarfimmi innuttaasut inaarutaasumik akiuussutissinneqarsimassapput, Peter Vedsted avannaani nakorsanut aqutsisoq oqarpoq nangillunilu:
- Periuseritikkusutarput tassaavoq ”appakaateriaritsi”, taamaammat nal. 13.00-ip 18.00-illu akornanni periarfissaqaleriaruit takkukkina taava tullinnguutipallassaatit. Immitsinnut mianeraluta Ilulissanut tikeraarusuttorpassuarnut ammaassiniarluta Kalaallit Nunaanni illoqarfinni kapuiffiulluarnerpaanngorta. Akiuussutissiinerlu nappaatinut aarlerinartunut illersuutaavoq aammalu akiuussutissinneqarsimanermut uppernarsaammik pisoqarsinnaassaaq.
Avannaani nakorsanut aqutsisoq isumaqarpoq, coronap allanngortua delta-mik taaneqartartoq tuniluuttupilussuummat aamma eqqarsaatigisariaqaripput. Taamaammat amerlanerpaat kapitipallannissaat kissaatigaa.