airplanebooksbriefcase business cogs cross election entertainment fish house law lockmedicalpeopleselfservices socialtax

Coronamik tunillatsittoqarneragut Qaanaami utoqqaat illuat matuneqarallarpoq

Qaanaami utoqqaat illuanni najugalik Nuummi misissortikkiartornerminut atatillugu coronamik tunillatsissimasoq paasineqarmat Qaanaami utoqqaat illuannut pulaartoqaqqusaajunnaarallarpoq.
17. november 2021
Qaanaami utoqqaat illuani najugalik coronamik tunillatsissimasoq Nuummi paasineqarpoq.
Utoqqaat illuanni najugalik Nuummi napparsimmavissuarmi novembarip 13-iani misissortinnerminut atatillugu coronamik tunillatsissimasoq paasineqarpoq. Utoqqarmik angallassisuusimasoq Qaanaamut uteriartorluni maanna Ilulissaniittoq maleruagassat naapertorlugit maanna aamma misissuivigineqarpoq.

- Taamaammat Qaanaami utoqqaat illuannut pulaartoqaqqusaajunnaarallarpoq, utoqqaallu illuanni najugallit coronamik tunillatsissimaratarnissaat paasiniarlugu misissuivigineqarput. Misissuinerit inernerinik paasisaqarnissatta tungaanut utoqqaat illuat pulaarfigineqarsinnaassanngilaq, Panigpak Daorana Qaanaami sullissivimmi aqutsisuusoq oqarpoq.

Coronap tuniluuteratarnissaa pinaveersaarniarlugu kommunimi upalunaarsimaniarnermut pilersaarutit malillugit Qaanaami utoqqaat illuanni upalungaarsimaniartoqalereerpoq.

- Tunillatsissimanerup aallaavia suli paasineqanngilaq, nalinginnaasumillu nuattoqarmat paasisaqaqqinnissatta tungaanut Qaanaami innuttaasut eqqissisimagallarnissaat inassutigaarput, Panigpak Daorana oqarpoq.

Allattoq: Káte Hansen, khan@avannaata.gl
Asseq: Toqqorsivik