Aallaqqaammut Upernavimmut nunaqarfiinullu angalasoqartussaagaluarpoq kisianni silap atorsaannginnera peqqutaalluni Upernavimmut angalasoqanngitsoorsimavoq taava taarsiullugu Ilulissat nunaqarfiinut angalanissaq aaqqissuunneqarsimavoq. Upernavimmut nunaqarfiinullu angalanissaq aappaagumut kinguartinneqarpoq kingornalu Uummannamut Qaanaamullu angalasoqassaaq.
Ulloq siulleq Saqqamut Qeqertamullu angalapput aqaguanilu Ilimanamut Oqaatsunullu angalallutik. Teknikkimut ataatsimiititaliap angalanerata siunertaraa nunaqarfiit qanoq innersut misissornissaat aamma Nunaqarfinni aqutsisut sinniisaat oqaloqatiginissaat. Teknikkeqarfiup ingerlatsiviani sulisut nunaqarfinni eqqaavissuit maanna iluarsaanneqartut kiisalu kommunip illuutaat misissorniarlugit immikkut sammisaqarput.
Ilimanami aqqusiniliorneq maanna ingerlanneqarpoq, tassani nunaqarfimmiut, kommuni suleqatigalugu aqquserngit iluarsaappaat, ilaatigut atv-t ingerlaffigisinnaasaannit beton atorlugu toqqaviliorput. Ilaatigut Saqqami apersuutigineqarpoq, suliniummik assigusumik aallartitsisinnaanerlutik aamma tassunga atatillugu Nunaqarfinni aqutsisut suliniut taama ittoq qanoq suliarineqarsinnaanersoq ilitsersuunneqarput. Kommunip isumaa naapertorlugu orniginartinneqarpoq piffinnit sulisoqarnissaq. Taamaattumik piffinni suliniutit tunngaviusumik kommunimit tapersersorneqartuaannassapput.
Nunaqarfinni aqutsisut Ataatsimiititaliap teknikkeqarfiullu ingerlatsiviani sulisut tikeraarnerat qujamasuutigaat.
Peqataasut Nunaqafinnilu aqutsiut pitsaasumik oqaloqatigiipput. Sammisassarpassuit eqqartorneqarput, siunissami pitsanngorsaanissaq sulissutineqassasoq kissaatigineqarpoq: Aqqusinernut tunngasut, eqqagassalerineq, anartarfilerineq, nunaqarfiit ingerlatsivillu attaveqatigiinnerat allarpassuillu oqaloqatigiissutineqarlutik.
