Qaanaami innuttaasunut ataatsimiititsineq ornigarluarneqartoq
Issiaviit tamarmik ulikkaarput, upernassaq Aningaasaqarnermut Ataatsimiititaliaq innuttaasunik ataatitsimiititsimmat. Inuit 50-t missaani takkupput apeqquteqarusuttut amerlagaarmata ataatsimiinneq 2 tiiminik sivittortariaqarluni.
Suna tamaat apeqqutigineqarpoq. Innuttaasunik immikkoortumi nunap ataata aalasarnerata kingunerisinnaasai pillugit apersuisoqarpoq tassungalu atatillugu nassuiaanneqarput kommunimi sumiiffinni arlalinni silaannaap allangoriartornera pillugu unammillernartut politikkikkut eqqumaffigineqarluartut.
Inissiat amerlanerit pitsaanerillu kiisalu sumiiffinni aqquserngit umiarsualivimmillu nutaamik sananissaq periarfissaqarnersoq peqataasut arlallit apeqqutigaat.
Innuttaasut ataatsimiinneranni peqataasut arlallit eqqaavaat Qaanaamit Ilulissanut isorartoqimmat peqataasut ilaasa kommuni avinneqarnissaat pillugu periarfissaqarnersoq paasinnerusullutik apersuipput. Avannaata Kommunia maanna kommunit avinneqarnissaat pillugu periarfissaqarnersoq kiisalu tamassuma kingunerissinnaasai pillugit qulaajaaleruttorpoq, taanna suliaq 2023-p ingerlanerani naammassinissaa naatsorsuutigineqarpoq.
Sumiiffimmi iluarsiineq pitsaanerusoq
Ullumikkut Qaanaami kommunimi atorfillit 35-t missaanniipput politikerinillu innuttaasunut oqariartuutigineqarpoq sumiiffimmi pitsaasumik iluarsiisoqartariaqartoq.
”Sumiiffimmi pissutsit ilisimaneqarluarnerupput, sumiiffimmilu iluarsiissutissat pilersitsiniarnerillu amerlasuut pisariaqartitat nassaarineqarsinnaasut. Nalornisoqartillugu allattoqarfiup qullersaqarfianit siunnersorneqartuaannarnissaq periarfissaavoq aamma pitsanngorsaaniarsariuaannassaagut. Kisianni tassa ilissi maani avannaatungaaniittusi suna pitsaanerusoq nalunnginneruarsi,” Avannaata Kommuniani borgmesteri Palle Jerimiassen oqarpoq – aamma Aningaasaqarnermut Ataatsimiititaliami siulittaasuusoq.
Politikerinit aamma eqqumaffigeqquneqarpoq, Qaanaap eqqaani Nunaqarfimmi Ataatsimiititaliaqarlunilu Nunaqarfimmi Siulersuisoqartoq taakkulu suliassat ilaannit pitsaangorsaanissamut aallartitsisinnaaneranillu aningaasaateqartut periarfissaqartullu.
”Kommunalbestyrelsip sapinngisamik sumiiffimmi aalajangeeqataasinnaaneq soqutigaat. Innuttaasunik ataatsimiinnermi Palle Jerimiassen oqarpoq, 2023-miit sanaartornermut aningaasat innuttaasut amerlassusaat naapertorlugu agguaanneqartut tamannalu pillugu sanaartornermut aserfallatsaaliuinermullu aalajangiinissamut periarfissaqartut ”.
Innuttaasut ataatsimiinnerata kingorna oqaaseqaatit ajunngitsutut nalilerneqarput. Pingaartinneqarpoq kommunalbestyrelsimi ilaasortat ilaat – kiisami – Qaanaamukarmata angalanerullu nalaani kommunimi atorfillit ataatsimeeqatigimmatigit.
Siunissami isertitassat
Kingorna borgmesterip aamma sumiiffimmi aalisakkeriviup siulersuisui aqutsisuilu ataatsimeeqatigai kiisalu thulefondenimi ilaasortat sanasuunerillu ataatsimeeqatigalugit. Innuttaasut ataatsimiinneranni Qaanaap eqqaani aalisarnerunissaq inuussutissarsiornerullu ineriartortinneqarnissaa kissaatigineqarmat. Thulefondi aalisakkat peqatigiiaat misissorneqarnissaat pillugu aningaasaliisimavoq, Qaanaap eqqaani aalisartut aalisaannarsinnaanissaat taamaalillutillu isertitaqalernissaat qulakkeerniarlugu aamma tassani pineqarpoq piffissami sikoqarfiunngitsuni.
Tikeraarnerup nalaani oqariartuutigineqarpoq, atuarfimmut sanaartornermut atortussat tikisinniarnissaat ajornartorsiutaasoq, 2023-mut aningaasaliiffigineqareersunik. Aningaasaliissutit atornissaat qulakkeerniarlugu, tassa 1 million kr.-t pallillugit amerlassuseqartut. Kingornatigut Ilulissani ingerlatsivimmit aallartitat Qaanaamiipput taavaniinnerminnillu illoqarfimmi entreprenørit sanasullu iluarsaassinissaq pillugu eqqartuipput. 2023-mi aningaasat illunut pingasunut iluarsaassinissamut atorneqarnissaat naatsorsuutigineqarpoq aamma atuarfimmi suliap 2024-mi ingerlanneqarnissaa naatsorsuutigineqarluni.
Aningaasaqarnermut Ataatsimiititaliamit ilaasortat/sinniisullu Qaanaami innuttaasunik ataatsimiititsinermi uku peqataapput:
Borgmesteri Palle Jerimiassen (UA), siulittaasoq
Jens Ole Nathanielsen (IA)
Anthon Frederiksen (N)
Lena Ravn Davidsen
Ane Qujaukitsoq
Margrethe Christensen (S)
Avannaata Kommuniani Ataatsimiititaliat ataavartut ilaasortaat ugguuna takusinnaavatit.
Aammaa Nunaqarfinni aquisisut Najukkami ataatsimiititaliat takusinnaavatit, taakku tassaapput sumiiffimmi aalajangeeqataasartut, sumiiffinnilu aalangersimasuni qanoq ineriartortitsisoqarsinnaanersoq pillugu aalangeeqataasinnaasut.
