Issittumi aallartitat Avannaata Kommuniani ataatsimiissapput
Sapaatip akunneri pingasut qaangiuppata Ilulissat sammisarpassuarnik, ataatsimoornernik suleqatigiikkuutaarnernillu sajukulaartuinnaassaaq, Inuit Issittormiut Kattuffiata naggueqatigiit Inuit, issittumilu inuit inoqqaavi allat illoqarfimmi katersuutsippagit ulluni 17-21. juli.
ICC, Inuit Issittormiut Kattuffiat nunat tamalaat akornanni naggueqatigiit Inuit 180.000 miss. Alaska-mi, Canada-mi, Kalaallit Nunaannit Chukotka-milu (Russit nunaanni) nunaqartut sinnerlugit suliniaqatigiiffiuvoq.
Inuit Issittormiut Kattuffianni ataatsimeersuariaqataasut oqaluuserisassarpassuaqarput.
“Erinisoqaagut Inuit Issittormiut Kattuffiata ataatsimeersuarnissaanut peqataajartortut tikinnissaannut maanilu Ilulissani ataatsimiinnissaannut. Maaniinnissaat sutigut tamatigut pitsaanerpaamik puigunaannerpaamillu misigisaqarfiunissaa kommunitut isumaginiassavarput” Avannaata Kommuniani borgmesteri Palle Jerimiassen oqarpoq.
ICC naapertorlugu peqataassappat Alaska-miit, Canada-miit, Saamit nunaanniit aallartitat, kiisalu nunanilu issittumiittuni suliniaqatigiiffiit sinniisaat.
“Ataatsimiinnerup siunertarissavaa ICC-p suliaasa ingerlanerisa isummersorfigineqarnissaat, piffissami qaangiuttumi ineriartornerup isummersorfiginissaa, ICC-p sulinissaminut pilersaarutaasa ineriartorteqqinnissaat, Ilulissanit nalunaarutissaq ilanngullugu kiisalu Inuit ataatsimoornerat ileqqorisaasalu nalliuttorsiutiginissaat” ICC taamatut tusagassiorfitsigut nalunaaruteqarpoq.
ICC-mi ataatsimiinnerit avataatigut pisussanik Avannaata Kommunia pilersaarusiorluni ulappuseruttorpoq, ilaatigut kultoorikkut misigisassarpassuit piareersarlugit.
““Tamatsinnut pingaaruteqarpoq issittumi naggueqatitsinnut attaveqaatitta attattuarnissaat nukittorsarnissaallu. Oqaluttuarisaanitsinni sivisoorsuarmik ataatsimoorluta ileqqoqarpugut, oqaaseqarputut kultooreqarlutalu. Immitsinnut naapilluta ataatsimiinnissarput pitsaassaqaaq. Aaqqissuussinerpassuarnut illoqarfimmiut tamarmik peqataanissaminnut periarfissaqassapput” Palle Jerimiassen oqaluttuarpoq.
Arctic Peoples Conference
Ulluni 17.-19. juli workshoppit ingerlanneqarpata Imartat pillugit Aqutsilluarneq, Atortulersugaanikkut Amigaatit, Piniarneq Isumannaatsumillu Inuussutissaqarneq, Nunat Inoqqaavisa Oqaasii pillugit Nunarsuaq tamakkerlugu Ukiorititat Qulit kiisalu ICC-p Aqunneqarnermigut Aaqqissugaanera sammineqassapput.
20.-21. juli ICC isumasioqatigiissitsissaaq, 1973-imi isumasioqatigiissitsineq siulleq tullilerneqarsimanngitsoq, Arctic Peoples Conference, ukiut 50-inngortorsiornerat malillugu ingerlatissallugu. Isumasioqatigiinnermi ukiuni 50-ni angusat eqqartorneqassapput.
”Inuiaat Issittormiut Ataatsimeersuarnerat Issittumi naalakkersuilluarnermik siuarsaanissamut periarfissatsialaassaaq Issittormiullu nangittumik eqqisseqatigiinneq tunngavigalugu inooqatigiissinnaanissatsinnik tunngavilersueqataasinnaalluni”, ICC allappoq.
Ilulissani pilersaarutit alakkartarsinnaavatit Avannaata Kommuniata nittartagaani aamma Facebook-imi quppernerani.
ICC-p nittartagaani paasisaqarnerusinnaavutit
ICC-mut aallartitat ataatsimiinnissaat kisiat Borgmesterip Kommunalbestyrelsillu Avannaata Kommunianut tikisissimanngilai. 2023-mi ukiakkut silaannaap pissusaa pillugu ataatsimeersuartoqartussaavoq. 2024-imi siku-nipilersorneq-festival ingerlanneqassaaq, ujakkaartoqassalluni, Issittumi pinnguaatit unammiuaarutigineqassallutik, kiisalu Piniarneq Aallaaniarnerlu pillugu saqqummersitsinersuaq ingerlanneqassallutik.
Politikkikkut anguniarparput piffissap takornariaqarfiusartup siaarnerunissaa, ilaatigut ukiaanera ilanngullugu aammalu aaqqissuussinerit assigiinngitsut, najukkatsinni kultooritsinnit ileqqutsinillu sorlaqartut ilanngullugit maani ingerlanneqartarnissaat” Avannaata Kommuniani borgmesteri Palle Jerimiassen oqaluttuarpoq.
