Nunatsinni kommune-t avannarlersaani pinerlunniarnerit assigiinngitsut unammillernartut nakkutigilluarnialerpai, amerlasuullu peqataatinneqassapput aaqqiissummik innuttaasut akimorlugit peqataatitsinermi. Tassami Avannaata Kommunia Nunatsinnilu Politiit isumaqatigiissimapput sumiiffimmi siunnersuisoqatigiiliorniarlutik.
Avannaata Kommunia taamaalilluni Nunatsinni kommune-t pingajuattut, sumiiffimmi siunnersuisoqatigeeqalerpoq, tamannalu alloriarnerit pingaarnerit nunatta Avannaani pinerlunniartarnerit appartinnissaannut pinaveersaartinnissaannullu alloriarneruvoq pingaarutilik, taama nassuiaavoq politikommisær Palu Eriksen, Politiit immikkoortoqarfiani Ilulissani pisortaq:
”Kommune-p politi-llu akornanni suleqatigiilluareerpugut. Sumiiffimmi siunnersuisoqatigeeqalerneratigut innuttaasut arlaqarnerusut peqataalissapput, tamannalu pinerlunniartarnernut appartitsinermik pitsaaliuinermullu nukittorsaataassooq, pissutigalugu amerlanerusut peqataalissammata aaqqiissutissanik pitsaasunik nassaarniarnermi,” politikommisær Palu Eriksen oqarpoq.
Innuttaasut puimassusillillu avaqqunneqarsinnaanngillat
Nunatsinni kommunini allani Qallunaallu nunaanni misilittagaq pingaarutilik tassaavoq, suleqatigiinnerit siammasissut iliuusissanik nutaanik pinerluttuliornerit iliuuseqarfiginissaannut aaqqiissusiorsinnaalernissaq. Taamaattumik sumiiffimmi piumassusillit, suliffeqarfiutillit, peqatigiiffilerisut allallu sumiiffimmi iliuuseqarsinnaasut aggersarneqarsimapput aallartisarluni ataatsimiinnermi Ilulissani Uummannamilu. Tassani pinerlunniartarnerit unammillernartui ilaatigut erseqqissaatigineqarput, kiisalu takorluukkaniik siunertaniillu ajornartorsiutinut eqqartorneqarput isumassarsiallu oqallisigineqarlutik.
”Innuttaasut najugaqarfimminni toqqissisimasutut misigisimassapput. Isumaqaraanni illoqarfimmi piffiit arlaanni taarpallaartoq, taava sumiiffimmi siunnersuisoqatigiinnut saaffiginnittoqassooq. Taamaalilluta arlaqarnerulluta ulluinnaat toqqissisimanarnissaat qulakkiissallugu,” taama oqarpoq Ineriartornermi ingerlatsiviup pisortaa, Aka Grønvold.
Isumasioqatigiinnermi København Vestegns Politi-niik aamma saqqummiussisoqarpoq, ukiorpassuarni sumiiffimmi siunnersuisoqatigiinni suleqataanerminnni misilittakkaminnik avitseqatiginnillutik. Taamaaliorlutillu Herlev Kommune-miik, Albertslund Kommune-miik kiisalu Tåstrup Kommune-miik aallartitat peqatigalugit. Taavalu aamma nunatsinni kommune-niik sumiiffimmi siunnersuisoqatigeeqareersuniik misilittakkanik avitseqatigiittoqarportaaq.
Borgmester-ip suleqatigiinnissaq qilanaaraa
Sumiiffimmi siunnersuisoqatigiit pilersinneqareersut ilaasortaat Uummannaq, Upernavik kiisalu Ilulissat peqataapputtaaq. Kingusinnerusukkut aamma Qaanaaq ilanngutissooq. Borgmester Palle Jerimiassen nassuiaavoq:
”Sumiffimmi siunnersuisoqatigiit tamaginnut nutaarluinnaavoq. Kingunissaavoq, sorlanitsitassaq alliartortussarlu, kingunerisasa katersortalernissaannut. Ilulissani, Uummannami Upernavimmilu aallartippugut, aallartilluareerpatalu, Qaanaamut ingerlaqqissuugut,” taama oqarpoq Palle Jerimiassen, Avannaata Kommunia.
”Suleqatigiinnissamut qilanaartorujussuuvunga kiisalu ingasammik inernerisassaanut, takkuttussanut. Suleqatigiit pisussaaffeqarput tigussaasunik inerniliissallutillu iliuuseqassallutik, kiisalu innuttaasut toqqaannartumik siunnersuuteqarsinnaanerannik ilisimasaanillu peqataatissallugit. Tassami, isumaqarpunga siusinnerusukkut pitsaaliuinermi suliniutigineqartartuniik allanngortitsisorujussuussasoq.”
Avannaata Kommuniata saniatigut sumiiffimmi siunnersuisoqatigiinnik pilersitsoqareersimavoq Kommune Kujalleq-mi aamma Qeqqata Kommunia-ni. Nunatsinni Politi-niik pilersaarutit malillugit nunatsinni kommune-t tamarmik Sumiiffimmi siunnersuisoqatigeeqalernissaat ukiup naannginnerani pissasoq naatsorsuutigineqarpoq.
