Timersualaarnerit, pinnguarnerit aliikkusersoqatigiillunilu sammisaqartitsinerit sapaatip akunnerini marlunni ingerlanneqareerlutik tassa maanna naanialerput. Kullorsuarmi kajumissutsiminnik suliaqartut allanik qulingiluanik nunani allaneersunik kajumissutsiminnik suliaqartartunik peqateqarlutik nunaqarfimmi meeqqanut inuusuttunullu aasaanerani tammaarsimaartitsipput.
Najugarisami kajumissutsiminnik suliaqartut ilagaat Susanne Eliassen. Kullorsuarmi najugaqarpoq, aasarlu kingulleq aamma kajumissutsiminik suleqataavoq ernermi sisamanik ukiullip Ilannguup aasaanerani tammaaqataaffigisaani Camp Kulloq-mi. Susanne aasaq manna aaqqissuussinermi alloriarsimavoq tammaarsimaarnermi pisortap aappaatut atorfeqarami.
“Takusinnaasimavara aasaq kingulleq meeqqat inuusuttuaqqallu qanoq amerlatigisut peqataasut, peqataallunilu nuanneqaaq. Taamaattumik eqqarsarsimavunga aasaq manna tammaarsimaarnermi pisortaasinnaallunga” 27-nik ukiulik Susanne Eliassen oqaluttuarpoq.
Camp Kulloq-p pilersaarusiorneqarnerani ingerlanneqarneranilu qaammatini arlalinni peqataasimavoq.
“Nuannarilluinnarpara aasaanerani tammaarsimaarnermi aaqqissuisooqataanera, aammalu kajumissutsinnik suliaqarnermi siulersortitut inissisimaninni ilikkagaqarsimaqaanga. Pissanganaqaaq alutornarlunilu nunanit allanit kajumissutsiminnik suliaqartunik taama amerlatigisunik naapitaqarluni ataatsimoorluaqaagullu, ilaaluunniit ilaquttattut isigivakka” Susanne oqaluttuarpoq.
Kullorsuarmi aasaanerani tammaarsimaartitsinermi kajumissutsiminnik suleqataasut 20-it affaat Kullorsuarmeersuupput. Sinneri makkunanngaaneerlutik: Serbien, Tjekkiet, Hong Kong, Mexico, Estland aamma Danmark.
Kajumissutsiminnik suleqataasut makkuninnga sammisassaqartitsisimapput: isikkamik arsarneq, basketball, høvdingebold, ujaqqanik qalipaaneq, illersartorneq il.il., lego pinnguaatillu allarpassuit. Tammaarsimaarnissamut atortussat ilaat, sikuuneranik pissuteqartumik, kingusinaarlutik aatsaat nunaqarfimmut apuussimapput, tamassuminngali pissuteqartumik akunnattooraluarnerit taarserniarlugit kajumissutsiminnik suliaqartut sammisassaqartitsinissaminnik allanik nassaarluartarsimapput.
”Immitsinnut oqaluttuuttarpugut takutittarlutalu, qanoq najugaqarnerlut inuunerlutalu, kultoorerput ilanngullugu. Nerisassallertarsimavugut qernertap neqaanik, mattaanik puisiminermillu nunanit allanit kajumissutsiminnik suliaqartunut. Taakku aamma nerisassiarisartakkaminnik misiliitippaatigut” Susanne Eliassen oqaluttuarpoq.
Kajumissutsiminnik suliaqartut ilaat Mexico-meersoq assersuutigalugu sammisaqartitsisimavoq, najukkami meeqqat inuusuttuaqqallu Piñata qanoq suliarisarneraat (mexico-mi anaalerivissiornermi nappartaq pappialaasoq qanoq sananeqartarnersoq) Mexico-milu ileqqortik tamanna oqaluttuaralugu.
Nunaqarfimmiunut tamanut fiisti
Tammaarsimaartitsineq meeqqanut inuusuttuaqqanullu aaqqissuussaagaluartoq, taamaattoq inersimasorpassuit takkussuuttarput, angajoqqaat aanaakkullu, Maria Brix Rasmussen Danmarkimeersoq tammaarsimaarnermilu pisortamut aappaasoq oqaluttuarpoq.
”Meeqqanut inuusuttuaqqanullu tammaarsimaartitsineq sammisitaavoq, taamaattorli inersimasorpassuit takkuttarput. Arajutsinianngillutik imaluunniit meeqqat sammisassaqartinneqarnerini peqataajumallutik. Nuannersorujussuarmik immikkuullarissumillu aaqqissuussineq ingerlavoq, kajumissutsiminnik suliaqartut nunaqarfimmiullu akornanni ataatsimooqatigiinnermik pilersitsilluni” oqaluttuarpoq.
Maria Brix Rasmussen 29-nik ukioqartoq Kullorsuarmi aasaanerani tammaarsimaarnermi 2019-mi pisortaasimavoq. Qilanaarsimaqaaq aasaq manna Susanne peqatigalugu tammaarsimaarnermi pisortaaqqinnissaminut – nunaqarfiullu takoqqinnissaanut.
”Kullorsuaq immikkuullarissumik initulluni uummatinniippoq. Kajumissutsiminnik suliaqartut allat peqataasullu ilikkagaqarfigisaqaakka – neriuppungalu uanga aamma taakkununnga nutaanik misigisaqartitsisarsimassallunga” Maria Brix Rasmussen oqaluttuarpoq.
Aasaanerani tammaarsimaarnermi sammisassaqartitsinerit ajornartorsiutitaqanngitsumik ingerlanneqarput, oqaatsit assigiinngikkaluartut, kultoori qanorlu ukioqarneq. Najugarisami kajumissutsiminnik suliaqartut kalaallisuumiit kalaallisuumullu, qallunaatut tuluttullu nutserulluartarpaatigut.
”Timi ussersornerlu atorlugit paaseqatigiittoqarsinnaavoq, minnerunngitsumik qiimaqatigiilluni. Nunaqarfimmiut tikilluaqqulluarsimaqaatigut, tamatsinnullu misigisaq nuannerluinnartuusimavoq” Maria Brix Rasmussen oqaluttuarpoq.
Camp Kulloq 2023 8. juli naammassillugu katerisimaartitsisoqarlunilu nunaqarfimmiunut tamanut sammisassaqartitsisoqassaaq.
”Tammaarsimaartitsineq nuannerluinnartumik ingerlasimavoq, inuusuttorpassuillu nunanit allaneersut ilisarisarilersimallugit nunaminnilu inuunerat tusagaqarfigalugu. Ikioqatigiilluarpugut kajumissutsitsinnillu suleqataasugut ikinngutigiilersimalluta.” Susanne Eliassen oqaluttuarpoq, aasallu tulliani tammaarsimaarnermi aamma peqataaqqikkusulluni.
Tammaarsimaartitsineq ilaatigut Kalaallit Meerartaat (Foreningen Grønlandske Børn) suleqatigalugit aaqqissuunneqarsimavoq.
Nutaarsiassaq aamma Sermitsiaq.AG-kkut atuaruk: Nunarsuarmit tamarmeersut Kullorsuarmi aasaanerani tammaarsimaaqatigiittut | Sermitsiaq.AG
