Ilulissani utoqqaat illuanni najugallit aamma nuannaarutissinneqarput Inuit Issittormiut Kattuffiata Ilulissani ataatsimeersuarneranut atatillugu Kalaallit allamiullu eqqumiitsuliortortaasa sapaatip akunnerata matuma ingerlanerani aliikkusersuinerannit.
Avannaata Kommunia Inuit Issittormiut Kattuffiata ataatsimeersuarneranut qaaqqusisutut kultoorikkut pisussarpassuarnik pilersaarusiorsimavoq ataatsimut ima taaneqartunik: “Issittumi nunat inoqqaavisa nalliuttorsiutigineqarnerat”.
Assersuutigalugu pingasunngornermi inuusuttoq nipilersornermik qilaatersornermillu aliikkusersuisartoq “I Sing You Dance” Alaskameersoq Utoqqaat Illuanni aliikkusersuivoq najugaqartunut qiimmassaataaqisumik. “Aatsaat siullerpaamik qilaat taamaattoq misilippara”, taama oqarpoq arnaq utoqqaq, ernutaqqiutiminik nalliuttuujutigaluni.
Sapaatip akunnerata aallartinnerani quiasaarisartoq Piitannguaq aamma utoqqarnut aliikkusersuivoq, quiattatsitsisaqattaarluni eqqarsalersitsisarlunilu, nuannivissumik.
“Uagutsinnut pingaartuuvoq aamma maani innuttaasut illoqarfitsinnullu tikeraartut Inuit Issittormiut Kattuffiata ataatsimeersuarneranut atatillugu aaqqissuussanut nuannersaqataanissaat” Avannaata Kommuniani borgmesteri Palle Jerimiassen oqarpoq.
Illoqarfimmi inuusuttut sunngiffimmi ornittagaat aamma pulaarneqarpoq eqqumiitsuliortunit assigiinngitsunit, ilaatigut uaaeernerit qilaatersornerillu ingerlanneqarlutik.
Aaqqissuussinerit tamarmik akeqanngillat imigassartaqaratillu. Facebook aqqutigalugu pisut malinnaaffigikkit
Ilulissaniinngikkuit unnukkut kultoorikkut aaqqissuussat malinnaaffigisinnaavatit toqqaannartumik unnuit tamaasa tallimanngorneq 21. juli 2023 ilanngullugu, uani: https://youtube.com/live/v2M6iozsTVE?feature=share
Pilersaarutit 17. - 21. juli (avannaata.gl)
