Dorthe aamma Kragh Biilmann-ikkut inaat meeqqat inuusuttuaqqallu assiginik ulikkaarpoq, ukiut 20-it sinnerlugit ingerlaneranni meerarsiarisarsimasaasa assiginik. Oqaluttuassanik ulikkaarput, eqqaamasalersaarutigisinnaasaminnik.
”Aalisariaqatigalugillu pinialoqatigisarsimaqaagut. Allamik pitsaanerusoqanngilaq pinngortitamukarluni aavarnermik aalisarnermillu ilinniarnermiit. Taamaalilluta aamma inuunermi sapernarsinnaasut pillugit oqaloqatigiissuteqarsinnaasarsimavugut” Kragh Biilmann oqarpoq.
Dorthe aamma Kragh Biilmann Uummannami najugaqarput, meerarpassuarnut inuusuttuararpassuarnullu 2001-imiilli angajoqqaarsiaasarsimapput. Igaffimmi nuanneqqinnaartumi takisuumik nerriveqarpoq, inimilu teqeqqumi nalaasaarfeqarpoq, taamaammat inissaqarluarpoq meerarsiaasimasut pulaaraagasa.
”Ilaat amerlasuut ingerlalluaqaat, ilaallu namminneq meerartaarsimapput. Imaassinnaavoq ilaannikkut siunnersuutitsialannik amingaateqartartut ilaallu igaannut maqaasisartut, qanorlu sanasarnerikka pillugit paasisaqarusuttartut, namminneerlutik meeqqaminnut iggassissutigisinnaaniassagamikkit” Dorthe Biilmann oqaluttuarpoq.
Piffissaq nukissallu
Angajoqqaarsiaaniaraannni soorunami piffissaqarfigisariaqarlugulu nukissaqarfigisariaqarpoq.
”Akisussaafferujussuuvoq, meeqqallu ilaat nappaateqarsinnaasarput, ilikkarluartariaqakkamik, aatsaat taamaaliornikkut pitsaanerpaamik ikiorneqarsinnaaniassammata” Dorthe oqaluttuarpoq.
Taamaattumillu aappariit angajoqqaarsianngornissartik aalajangiutinnginnerani tamanna oqaloqatigiissutigisarsimavaat.
”Pingaartorujussuuvoq angajoqqaarsianngunnginnermi oqaloqatigiilluarnissaq. Isumaqatigiissutigisimavarput qanilaarnermik asanninnermillu tunniussassaqarluta inuunermillu pitsaasumik sinaakkusiisinnaalluta. Angajoqqaarsianngorsimanerput peqqissimissutiginngisaannarparput” Dorthe oqaluttuarpoq.
Ukiut ingerlanerini pikkorissarnerni arlalinni peqataasarsimavoq assersuutigalugu ADHD pillugu, autisme aamma angajoqqaajussuseq pillugu, kommunip Namminersorlutillu Oqartussat angajoqqaarsianut neqeroorutigisarsimasaanni. Tamakku aqqutigalugit aamma kitaanit tamanit angjoqqaarsiaasartunik allanik naapitaqartarsimapput misilittakkanik apeqqutinillu avitseqatigisarsimasaminnik.
”Pikkorissarnernut peqataaneq pitsaasuuvoq, sakkussanik ilisimasassanillu tunisisaramik, meeqqat pitsaanerpaamik ikiornissaannut iluaqutaasarlutik. Amerlasuutigummi immikkut pisariaqartitsisuusarput, aammami angerlarsimaffiup avataanut inissinneqarneq nikeriarnerujussuusarami” Dorthe Biilmann oqaluttuarpoq. Taamaattorli suliassat ernummatillu annikinnerupput illumi meerartaqarnerup nuannersortaqarneranut sanilliullugit.
”Asanninnermik qujaniarnermillu utertitsivigineqartaqaanga, qaaqqusaajuarpugullu kuisittoornernut, katittunut ullorsiornernullu allanut maani angerlarsimaffitsinni meerarsiarisarsimasatsinnut” Dorthe oqarpoq.
Angajoqqaarsiaasarnerput taamaatittarpoq inuusuttuaqqat 18-nik ukioqarleraagasa. Inuusuttuaqqalli ilaat tapersersorneqarnissaminnik atorfissaqartitsisinnaasarput, assersuutigalugu suliffittaarniarlutik oqaloqatiginninnerminni, meeqqallu angerlarsimaffiup avataanut inissinneqarnikuusut 18-nik ukioqalernerminni 18-23 akornanni ukiulinnut malitseqartitsinissamik neqeroorfigineqartarput. Taamaalilluni assersuutigalugu Kragh inuusuttuaraq suliffissarsiorluni oqaloqatiginninniarpat ilagisinnaasarpaa.
”Meeqqat uummatinniittuassapput. Kommunimit oqartarput paaqqutariinnartassagivut, uangali asalersoorsinnaasanngilakka” Kragh Biilmann kissalaartumik qungujulluni oqaluttuarpoq, inimi assit nivingasut oqaluttuariitigalugit qeqartut, juullisiortut allanilu ullorsiortut assigi pillugit.
.....................................................................................................................................
Ilaqutariit paarsisartut suli amerlanerit atorfissaqartinneqarput.
Ilaqutariittut paarsisartunngorusuppit? Taava Inunnik Isumaginninnermik Aqutissoqarfimmi atuarsinnaavat qanoq iliorlutit qinnuteqarsinnaanerit angajoqqaarsiaariaatsillu assigiinngitsut suunersut https://socialstyrelsen.gl/.../hvordan-bliver-man....
Soqutiginnikkut Inunnik Isumaginninnermik Aqutsisoqarfik attaveqaatit iluaqutigalugit paasissutissiilluni ataatsimeeqatigineqarsinnaavoq.
https://socialstyrelsen.gl/.../hvordan-bliver-man...
Aamma Avannaata Kommuniani Ilaqutareeqarnermut immikkoortortaq attavigisinnaavat meeqqat@avannaata.gl imaluunniit oqarasuaammut 70 18 00 sianerlutit.
