Kommunalbestyrelsimut taamalu kommunitsinni innuttaasunut qullerpaatut siuttutut inissisimaninni akisussaaffiga ilisimalluinnarpara. Avannaata Kommuneqarfiani allaffissornikkut ingerlanneqarnerani qullerpaatut siuttutut inissisimaninni suliassaq maniguullunga ingerlappara, Kommunalbestyrelsi, innuttaasut suliffeqarfiillu naalaartuarlugit. Pissutsit nalaatagut nuannerpata tujorminarpataluunniit, akisussaaffinnit qimarratiginninnavianngilanga. Borgmesteritut sulivunga, maanna qinigaaffiit aappassaanni, nuannaarutigaaralu tulluusimaarutigalugulu Kommunalbestyrelsi katersorsinnaasarakku isumaqatigiissillugulu suliarisatta amerlanerpaarpaartaanni. Kommunitsinnut pingaaruteqarpoq ataatsimoornissamut piumassuseqarnissaq aaqqiissutaasinnaasunillu pitsaasunik nassaarniaqatigiilluni partiimut sorlermut ilaasortaaneq apeqqutaatinnagu.
Maanna kommunip aningaasaqarniarnera eqqarsaatigalugu unamminartorsiorfiusumut pisimavugut. Aningaasanik tigoriaannarnik uninngasuuteqarnerput tatineqarpoq ukioq kingulleq missingersuutini atuivallaarsimanermik pissuteqartumik. Paasinninnera tunngavigalugu aningaasaatitsinnik aqutsinerliornermik pissuteqartumik tamaanga killissimanngilagut. Allaffissornermi aqutsinerup Kommunalbestyrelsilluunniit tungaaniit piaaraluni tamanna anguniarneqarsimanngilaq.
Kommuni 1.700 miss. sulisoqarpoq ullumikkullu missingersuutitsinnit tamarmiusunit kr. 1,0 mia.-nik amerlassuseqartunit kr. 800 mio.-it akissarsianut atortarpagut – tassa kaaviiaartitatta 80 %-ii. Pilersaarutaavoq akissarsiat siunissami kaaviiaartitatta 60 %-iisut annertussuseqalernissaat, taamaalilluta sanaar-tugassanut akissaqarniassagatta, assersuutigalugu inissianik amerlanerusunik sanaartornissamut. Tama-tuma malitsigissavaa sumi tamani sulisut sulisorisat ikinnerulernissaat. Atorfiit ilaat inuttaleqqinneqassanngillat sivittorneqassanatilluunniit. Allat sipaarutigineqassapput atorfiup inuttaarunnerani aammalu soraarsitsisoqartariaqarpoq – ilaatigut kiffartuussinermi atorfiit coronap nalaani immikkut pilersinneqarsimasut eqqarsaatigalugit.
Assersuutigilakka tigussaasut uku marluk:
Coronap nalaani kommunitsinni immikkoortortani arlalinni eqqiaasussanik amerlanerusunik atorfinitsitsivugut.
Utoqqarnik namminneq angerlarsimaffimminni najugaqartunik ikorfartorteqartitsinermut, utoqqaat illuini, meeqqerivinni il.il. coronap nalaani sulisussanik amerliliinikuuvugut taamanikkut nualluussuup tuniluunnerata nalaani pisariaqartitsineq annertusimmat. Assersuutigalugu sulisut siornatigut akunnerni marlunni sulisaraluartut akunnerni arfineq pingasuni sulisalersillugit.
Assersuutit takutippaat, kommunip akissarsianut aningaasartuutai taamaalillunilu innuttaasunut kiffartuussineq suliassaqarfiit ilaanni coronap nalaani annertuumik qaffariarsimasut. Imaassinnaavoq siusinnerusukkut iliuuseqarsimasariaqaraluartugut, kisiannili tassa massakkut ingerlatsineq pisariaqartitsinermut naapertuussarparput, soorlu corona sioqqullugu taamaassimasoq. Tamanna isumaqarpoq – siornatigullu taamaareersimalluni – sulisut ikinnerusut pisariaqartinneqartut.
Suli ineriartorneq, ingerlatsinerlu torraanerusoq
Sipaarniutissat aamma nalunaarutigisimavagut, taamaaliornikkut kissaatigingatsigu ingerlatsinermi aningaasartuutit ikilisinnissaat qulakkeerumallugu kommunitsinni ineriartornermut akissaqarnissarput. Borgmesterinngornerma kingornatigut ingerlatsinermut aningaasartuutit 150 mio. kr.-nik amerlisimavagut, naak suliagut innuttaasullu ukioqatigiiaanut agguataarsimanerat annertunerusumik allannguuteqarsimanngikkaluartoq. Kommunalbestyrelsimi ilaasortaqatikka suleqatigalugit paasisimavara aningaasanik atueriaaserput siunissami allaanerusariaqartoq.
Aalassatsitsisarpoq suleqatit pikkorissut kommunimilu innuttaasunik sullissilluarsimasut inuulluaqqunialersillugit. Suliunnaarsitsinerit kattuffiit paaseqatigalugit suliassaqarfinnilu taama ittuni najoqqutassat malillugit ingerlatissavagut. Kommunitsinni sulisussaaleqineq annertuvoq, taamaattumillu annilaaganginngilara suliffissaaleqinerup annertuseriarnissaa, takorloorsinnaallugulli sulisut piginnaasaqarluartut inuulluaqqusariaqalikkagut inuiaqatigiinni periarfissani allani neqeroorfigilluarneqarumaartut.
Ingerlatsiveqarfinni aaqqissuussaanermik allanngortitsineq ineriartornermullu aningaasaliinerit amerlanerusut kommunimi ataatsimiititaliani ataavartuni tamani, kommunimi Aningaasaqarnermut ataatsimiititaliami Kommunalbestyrelsimilu oqaluuserineqarsimapput. Suliassat tamakku allaaserineqarnikuupput sulisut amerlassusii ilanngullugit, taamaattumillu illuatungiliuttut aamma peqataanikuupput aalajangiinerni tamani kommunip aningaasaqarniarneranut tunngasuni. Taamaattumik maannakkut piffissaavoq Kommunalbestyrelsimi ilaasortat tamarmik akisussaaffimmik tigusinissaannut innuttaasunullu takutillugu siunissaq toqqissisimanartoq patajaatsorlu siunnerfigigipput