Meeqqat ataatsimeersuarneri

Borgmesteri Palle Jerimiassen (AT)  Avannaata Kommunia

Asasakka meeqqat isummersorfiini ilaasortat sullissisullu,

Qujanaq periarfissinneqarama oqaaseqalaarnissannut.

Avannaata Kommuniani meeqqat pillugit aalajangiisoqassatillungu, tusarniaasarnissamut periusissiamik kommunalbestyrelsi akuersinikuuvoq, taamaalilluta aamma aalajangiinialeraangatta meeqqat isumaat tusarniarneqarnissaannut uatsinnut pisussaaffilernikuuvugut.

Siorna Meeqqat Isummersorfiiniit kommunalbestyrelsimut siunnersuutigineqartut kommunalbestyrelsimi ukiormanna kommunalbestyrelsip ataatsimiinnerani oqaluuserivagut siunnersuutisilu tamaasa akuersarlugit suliassanngortillugit.

Aamma inuiattut ullorsiornitsinni inuusuttut oqalugiarneranni oqariartuutaasartut pingaartillugit kommunalbestyrelsimiit suliassatut tingusarpagut.

Oqariartuutisi ilaatigut silaannaap allanngoriartorneranut tunngasut aamma eqqaavilerinermut tunngasut anguniarneqassasut kommunalbestyrelsimiit aamma akuersissutigineqarput.

Siunnersuutigisasi oqaluuserigaagatsigit pingaartittarparput nammineq oqariartuutisi malillugit aalijangiisarnissarput.

Massakkut ataatsimeersuarnissinni sammisasi pillugit, Avannaata kommunia pingaartitsisuuvoq aamma periusissamik suliniuteqarpugut.

Toqqissisimasunik avatagiiseqarnissaq, ilikkagaqarnissamut sinaakkutinik pitsaasunik peqarnissaq pingaartipparput.

Kiisalu inuiaqatigiit peqqissusaat kikkullu tamarmik atugarissaarnissaannut tunngasunik suleqatigiinnikkut ataatsimoornikkullu pilersitsisarnissaq anguniartuarlutigu.

Taamaasilluta sunngiffinni kulturikkullu sammisassaqartitsininermi tamanut periarfissaqartitsineq ataavartumik ingerlakkusukkatsigu ineriartortillugulu.

Isummersornissinni utoqqartatta ilisimasaat, kulturikkut ineriartornermullu tunngasut, neriuppunga aamma paasiniartarnissaat eqqaamasassagissi taakkuuppummi massakkut killiffitsinnut sinaakkusersuisuusimasut.

Avannaata kommuniata anguniagarivaa, meeqqat inuusuttuaqqallu sinnerlugit sinaakkutissanik ersarissunik peqarnissaq.

Avannaata kommunia tassaarusuppoq meeqqat inuusuttuaqqallu nammineq pisariarfissanik pilersitsisartunik periarfissiisoq anguniagalillu.

Neriuppunga naapinnersi angusaqarfiulluarumaartoq, isummassinnillu tusagaqarnissara qilanaarilereerpara.

Pittaanerpaamik kissaallusi sulilluarnissassinnik kissaappassi.

Qujanaq