Pilersaarutit malillugit ingerlasoqassappat, atuartut siulliit 10-15 2024-p naalernerani atuarlutik aallartissapput. Periarfissaq takkuppoq ukiut aappaata affaa suliaqareernermi tassalu maanna Danmark-imi Brandskole-mi ataatsimiititaliamik inaarutaasumik akuerineqarpoq.
Avannaata kommuniani najugaq qimannagut ilinniarnermi pisariaarutissooq qatserisartut Danmark-imut aallartarnerat atuariartorlutik.
Avannaata kommuniani upalungaarsimanermut pisortap, Isak Pjetturson, nuannaarutigaa, ilinniartitaaneq kalaallisuinnaq ingerlanneqarsinnaalermat neriuutigalugulu kommune-mi qatserisartunik atorfinitsitsineq oqinnerulerlunilu aalajaattoqarnerulissasoq:
"Aalajangiisuulluinnarpoq, nammineq oqaartsivut atortussaammata, sulisut atuartinneranni. Siusinnerusukkut misigisarparput, Danmark-imi atuartut amerlasuut unitsitsiinnartartut, oqaatsinik ajornartorsiuteqarneq pissutigalugu unammillernartorpassuarnillu pilersitsisartoq.”
Avannaata Kommunia sisamanik qatserisartunik ilinniartitsisinnaasunik peqarpoq, nunagisaq qimannagu atuartitsisinnaasunik. Qallunaat atuartitsinermi atortagaat atuakkallu atorsinnaavaaq, kalaallisuunngorlugit nutserneqartussat. Upalungaarsimanermi pisortaqarfimmiik nakkutilliisumik toqqaasoqartassooq.
Atuartitaaneq akunnerni 164-ni sivisussuseqarpoq atuagarsornermi sulisaatsimilu. Aamma atuagarsorluni upalungaarsimaneq pillugu atuartitsisoqarluni qimuttuitsut ajutoornerini aammalu soorlu nunaannarmi nunaatilinni ikuallattoqartillugu nersussuaatilinnik puulukiutilinnillu.
Container-inik illoqarfiliaq sungiusarfigineqartassooq
Akuerineqarnermut ilaatigut piumasaqaataavoq ”Qatserisartutut ilinniarneq” container-inik illoqarfiliamik pilersitsisoqarnissaa, sungiusarfittut atugassatut, peqataasut iliuusissat pisariaqartut ilinniarnissaannut pikkorissinissaannullu. Sungiusarfissaq illoqarfiup avataaniippoq ilaatigullu container-it immikkut suliat ilaassallutik, qatserisartut piviusuusaartitsillutik ikuallattumi annaassiniarnermilu piviusuusaartitsinissamut.
”Ikuallanneq kiammik annertoorujussuarmik pilersitsisinnaavoq, pingaaruteqarporlu, piviusumut qanittumik sungiusarfeqarnissaq”, upalungaaarsimanermi pisortaq oqarpoq. Kissarnersiut natip nalaani 100 grad-it angusinnaavaat kiisalu ikuallattoqartillugu qilaami 800-900 grad-it angusinnaasarlugu.
Container-i, 500 grad-it angullugit kissanneqarsinnaasoq qatserisartut kiammut sungiusarnerminni akulikitsunik atortussaavaat. Aaama container-eqarpoq, illutut ilusilikkamik, taamaalillutik ilitsersuisut qatserisartut sungiusarneranni ilitsersuussinnaallugit sungiusarfiusumi, qimaaffissiat ilanngullugit.
"Naak periarfissaqaraluarluta nunarput tamakkerlugu qatserisartunik atuartitsinaalluta, taamaattoq siullermik qulakkeeqqaassuarput nammineq qatserisartuutitta,” Isak Pjetturson oqarpoq.
Taamaalilluni Avannaata Kommuniata alloriarneq annertooq upalungaarsimanermik nukittorsaanissaq qatserisartunillu ilinniartitsinissaq Nunatsinni unammillernartup aningorniarnissaanut iliuuseqarpoq.
