Nunatsinni aalisarnermut inatsisissatut siunnersuut ukiuni qulikkuutaani arlalinni aallartisarneqareerluni decembarip qaammataagaa 2023 tusarniaassutigineqarpoq.
Inatsisissatut siunnersuut 16-inik kapitaleqarpoq 150-gajannillu qupperneqarluni, atortussiaq annertoqisoq Avannaata Kommuniani aalisartunut annertuallaarpoq. Taammaattumik aalisartut ulluni kingullerni Avannaata Kommuniani politikerit ataatsimeeqatigisarpaat, aalisarnermut inatsit tamakkiisumik paasinngitsoornissaanut ulluinnarnilu inuunerminnut kingunipiloqarsinnaanera kiisalu kinguaariinnut tulliuttunut inuiaqatigiinnullu annilaaagassuteqarnertik paasitikkusullugit. Isumaqaramik tusarniaanermut killissarititap sivikippallaarnera pillugu tusarniaanermut akissutinik nassiussinissamut naammattumik piffissaqaratik.
Tusarniaanermut killissarititaq sivikippallaartoq
Aalisarnermut inatsisissaq ukiut 20-jaat suliarineqarpoq tassalu januaarip qaammataata ulluisa 24-t 2024 tusarniaanermut killigitinneqarluni.
”Tusarniaanermut killissarititaq sivikippallaarpoq. Soorunalimi aalisartut inatsisip qanoq kinguneqarnissaa iluamik paasisinnassanerlugu annilaagatigaat. Atortussiaq annertoqaaq aamma tamarmik naammaginartumik inatsit annertooq paasinissaanut kiisalu pisarialinnik isummernissaminnut periarfissaqassagunik killissarititaq sivittortariaqarpoq” Avannaata Kommuniani borgmester Palle Jerimiassen oqarpoq.
Avannaata Kommuniani innuttaasut amerlanersaat toqqaannartumik toqqaannanngikkaluartumilluunniit aalisarnermit isertitanut attuumasssuteqarput. Taamaattumik soqutigisanut amerlasuunut sunniuteqarpoq aamma aalisarnermut inatsit nutaaq Avannaata Kommuniani aalisartorpassuarnut pingaaruteqaannarani nuna tamakkerlugu pingaaruteqarpoq.
”Aalisarneq aalisarneq illersortussaavarput nutarterlugulu. Avannaata Kommuniani umiatsiaararsorneq inuussutissarsiutaavoq annertooq, inuussutissarsiut kisiat pinnagu aammali inooriaaseq kinaassuserlu tassani pineqarput. Ilaqutariippassuit sunnerneqartussaapput pingaaruteqarporlu isumaat tusassallugit tusarniaanermullu iluamik peqataatittariaqarpagut” Palle Jerimiassen oqarpoq.
Kommuni tamakkerlugu aalisartut naapinnissaat
Taamaattumik Palle Jerimiassenip aalisartullu peqatigiiffiata eqqumiigaat Aalisarnermut Piniarnermullu Naalakkersuisoq, Kim Kielsen (S) taamaallaat Ilulissani ataasiaannarluni innuttaasunut ataatsimiititsinissaq 2 tiiminik sivisussusilik pilersaarutigisimammagu.
Borgmesteri Palle Jerimiassen (AI) aalisartullu peqatigiiffiata Kim Kielsen sakkortuumik piumaffigaat Uummannami Upernavimmi Qaanaamilu aamma ataatsimiititsissasoq. Avannaata Kommuniani avammut tunisassiornermi 50 prosentigajak aalisarnermit isertitaasarput inuussutissarsiullu illoqarfinni nunaqarfinnilu tamani pingaaruteqarpoq.
”Ataasiaannarluni innuttaasunut ataatsimiititsineq naammanngilaq. Aalisartut ilimagisariaqarpaat iluamik Naalakkersuisoq oqaloqatiginissaa taamaalilluni inatsisip nutaap iluamik saqqummiunnissaanut aamma aalisarnermut inatsimmut suliap ingerlateqqinnissaanut pingaarutilinnik ilanngussinissaminnut periarfissaqalissapput” Avannaata Kommuniani borgmester Palle Jerimiassen oqarpoq.