Avannaata Kommuniani sulisut 24-it ”Ilaqutariinneq aqqutissioqatigiinneq” pillugu immikkoortut tallimat angusaqarfigalugit pikkorissarfigisimavaat.
Tamanna Ilulissani nalliuttorsiutigineqarpoq, pikkorissarnerup immikkoortuata tallimaanik peqataasut naammassinnimmata allagartartaartinneqarlutillu. Sulisut Ilulissani ulluunerani neqeroorutiningaaneerput, atuarfinnit aamma fritidshjemme-meersuullutik. Taakku ukiut marluk ingerlaneranni Ilaqutariinnik aqqutisssioqatigiissitsisartutut piginnaanngorsarneqarlutik atuartinneqarsimapput.
Ilaqutariinnik aqqutissioqatigiinneq suleriaasiuvoq, ilaqutariit, meeraq aamma inuusuttoq tusaallugit, aqqutissioqatigiinneq, ”ataqatigiissaarisoq” suleriaatsimik ilisimannittoq ilitsersuisinnaasorlu peqatigalugu. Peqatigiillutik aalajangersinnaavaat, siumut isigaluni meeraq inuusuttorluunniit iluaalliuuteqartoq qanoq pineqassanersoq.
”Ilaqutariinnik aqqutissioqatigiinneq kalaallit ilaqutareeriaatsimikkut kultooriannut tulluartuuvoq. Siornatigumut sanilliullugu piaarnerusumik aaqqiissutissanik nassaarnissamut periarfissiivoq, ilaqutariit iluanni attaveqaataasut peqatigalugit. Sulisut piginnaasaminnik qaffassaajumallutik suliamik qanoq annertutigisumik takutitsinerat ajasoorutigivara,” Avannaata Kommuniani Ilaqutareeqarnermut Ingerlatsivimmi pisortaq Aviâja Madsen oqarpoq.
Taanna oqaluttuarpoq, ilaqutariinnik aqqutissioqatigiissitsisarnermik sulisut piginnaanngorsarneqarnerat Isumaginninnermut Aqutsisoqarfik suleqatigalugu ingerlanneqartoq. Ilanngullugu oqaatigivaa 2024-ip upernariartornerani Upernavimmi sulisut tulliullutik taamatut pikkorissarneqartussaasut.
”Ilaqutariinni aqqutissioqatigiinnerup nukittoqqutigivaa, ilaqutariit tamarmiutillugit ilaqutariillu namminneq attaveqaataat pingaarutillit peqataatillugit pilersaarusiortinneqarsinnaammata. Suleriaatsimik tamatuminnga atuisut allat misilittagaat naapertorlugit oqaatigineqarpoq, maannamut periusiusartunit pilertornerusumik aaqqiissutissanik nassaartoqarsinnaammat, inuunerissaannginnerlu pilertornerusumik aaqqiivigisinnaallugu ajornerusumik pisoqarnissaa taamaaliornikkut pinaveersaartinneqarsinnaalluni.” Aviâja Madsen oqaluttuarpoq.
Ilaqutariit aqqutissioqatigiissinneqarnissaannik noqqaasuusinnaavoq kinaluunniit, meeqqap inuusuttuaqqalluunniit peqqinnissamigut, inuunerissaarnissamigut ineriartornissamigullu arlaatigut ernumanartoqartitsisoq navianartorsiorneranilluunniit takunnissimasoq.
”Ataqatigiissaarisup” peqataatissallugit tulluartut angerlarsimaffimmut ataatsimiigiaqqussavai, ataasimoorlunilu aaqqiissuteqarnissaq nassaaralugu.
Assersuut imaassinnaavoq, ilinniartitsisup malunginiaraa, atuartoq aalajangersimasoq atuarfimmut inortuikulaartoq. Tamanna atuartup malinnaaniarneranut akornutaavoq, kinguussaajartulersinnaallunilu. Ilinniartitsisup siunnersuutigisinnaavaa tamanna pillugu Ilaqutariit aqqutissioqatigiissinneqassasut. Imaassinnaavoq aataajusoq ajaajusorluunniit ikiuussinnaasut, meeqqap makiaartalernissaanut taamaalillunilu inortuinani atuariartornissaanut.
”Ilaqutariinni aqqutissioqatigiinneq tamatta atulereerparput, malunnarporlu ilaqutariit attaveqaataasalu ataatsimoortinneqarnerisigut aaqqiissutissanik meeqqat pineqartut inuunerinnerulernissaannik malitseqartussanik tigussaasunik nassaarsinnaasugut,” Ilulissani Ilaqutariit illuanni immikkoortortami pisortaq Mike-Lars Zeeb oqaluttuarpoq, taanna sulisut, maanna Ilaqutariinnik aqqutissioqatigiissitsisinnaalersimasut ilagaat.
Meeqqat inuusuttullu oqaasissaqaqataalissapput
Ilaqutariinni aqqutisssioqatigiinnerup aallaavigisarpaa meeqqap inuusuttuaqqallu pisariaqartitaa, taamaattumik aamma aperineqartuaannassapput, ”ilaqutariinni aqqutissioqatigiinnermi kina peqataatikkusuppiuk?” Meeqqat inuusuttuaqqallu peqataasut, tapersersorteqarsinnaapput, oqaatigerusutaminnik anitsisinnaanerannik ikiuussinnaasumik. Ilaqutariinni aqqutissioqatigiinnermi tapersersorti meeqqamik inuusuttuaqqamilluunniit ikorfartuissaaq.
Ilaqutariinni aqqutissioqatigiinnerup atungaalerneratigut Avannaata Kommuniata naatsorsuutigivaa, meeqqanut inuusuttuaqqanullu suliniutissanik pilertornerusumik aallartitsisoqartalersinnaanissaa, taamaaliornikkullu angerlarsimaffiup avataanut inissiisarnerit annertunerusumilluunniit iliuuseqarnerit ikilisillugit.
Isumaginninnermik Aqutsisoqarfiup nittartagaani Ilaqutariinni aqqutissioqatigiinneq pillugu annertunerusumik atuagaqarsinnaavutit Familierådslagning (socialstyrelsen.gl), tassani atuagaaraqarpoq tamanna qanoq ingerlasarnersoq pillugu sukumiisumik paasissutissiisumik.
Sulisunik piginnaanngorsaaneq Isumaginninnermut Aqutsisoqarfiup aningaasalerpaa, Avannaatalu Kommuniani sulisut 24-it atuartillugit, taamatullu kommunimi najukkani allani sulisunik atuartitsinissat aamma taama pissallugit.
