Avannaata Kommuniani kommunalbestyrelsip aalajangiuteqqammerpaa Avannaa Arctic Games pillugu isuma piviusunngortinniarlugu ingerlateqqinneqassasoq. Taanna timersornikkut unanniuaartitsinerussaaq naggueqatigiit Inuit timersornikkut pinnguaataat aallaavigalugit.
Pilersaarutit malillugit Avannaa Arctic Games siullermeerluni februar 2025-imi Ilulissani ingerlanneqassaaq, nunat uku peqataatitaqassallutik Nunavut, Nunavik, Alaska aamma Kalaallit Nunaat. Taamaaliornikkut kissaatigineqarpoq naggueqatitsinnut Canadami Alaska-milu nunaqartunut attaveqarnitta suli nukittorsarnerunissaa.
”Kommunerput tamakkerlugu issittormiut timersoriaasiini pimoorussillutillu pikkorissunik timersornermik ingerlatalippassuupput, taamaattumik aaqqissuussineq Avannaa Arctic Games-itut ittoq timersornikkut kultoorikkullu aaqqissuussinerussaaq soqutigineqartorujussuaq.” Avannaata Kommuniani borgmesteri Palle Jerimiassen oqarpoq.
Taanna siuttuussaaq Arctic Winter Games Alaskami ingerlanneqalerpat maanngaaniit kommuni sinnerlugu angalaqatigiinnut, naalakkersuisunik aalajangiisartunillu allanik ataatsimeeqateqariartortussanut. Isuma taanna kommunimi pileriartortinneqarsimavoq maannalu isumassarsiaq saqqummiukkiartorneqassaaq peqataasussanik qaaqqusiartuutigalugu.
Avannaa Arctic Games suliniutinut nutaanut allanut ilaavoq, Avannaata Kommuniani najugaqarnissamut, sulinissamut tikeraarnissamullu soqutiginninnermik annertusaaqataasussanut.
”Politikkikkut isumaqatigiippugut Avannaata Kommunianut aaqqissuussinerit immikkuullarissut maani ingerlanneqartarnissaannik pilerisaarissalluta namminerlu pilersitsisassalluta, periarfissatta iluanni. Anguniarneqarpoq piffissap takornariaqarfiusartut sivittornissaa aaqqissuussinerit assigiinngitsut aqqutigalugit, takornarianut maanilu najugaqartunut pissanganartut.” Palle Jerimiassen oqarpoq.
Ice Music Festival 2024
Aaqqissuussinerit immikkuullarissut maani ingerlanneqartarnissaannik anguniarlugu suliniuteqarnerit aallartinneqareerput. Sapaatip akunnerata naanerani 9-10. marts 2024 Ice Music Festival, siullermeertumik Kalaallit Nunaanni ingerlanneqassaaq, taaguuteqartinneqassalluni Greenland Sessions.
Norgemi Ice Music Festival tusaamaneqarpoq nunarsuarmi aaqqissuunneqartartutut immikkuullarissutut, ukioq mannalu 19-issaannik ingerlanneqassalluni, siku, nipilersorneq, eqqumiitsuliorneq silaannaap pissusaanik ilisimatusarneq ataatsimoortillugit aaqqissuussinikkut. Tusarnaartitsinerit marluk ingerlanneqassapput, scene immikkut sanaaq atorlugu aamma nipilersuutit sermimik immikkuullarissumik sanaat atorlugit. Sermit tamakku maani aalisartut Ilulissat eqqaani Kangianiillu aasimavaat.
Ice Music Festival-imut qaaqqusisuuvoq Kangiata Illorsua illoqarfiullu meerartai immikkut sessions-inut qaaqquneqarput siku pillugu soqutiginnilersinniarlugit aamma ilisimatuut sikumik silaannaallu allanngoriartornera pillugu ilisimatusaraagamik suna paasiniartarneraat.
Kalaallit erinarsortartut nipilersortartullu tusarnaartitsinernut qaaqquneqarput, tusarnaartitsinerlu aqunneqassaaq Treje Isungsted-imit; taanna norge-miuuvoq nunarsuaq tamakkerlugu erinniortutut nipilersortartutullu tusaamasarsuuvoq.
”Inuit pikkorissut suliaminnullu tiguartisimalluinnartut suleqatiserisarpagut, aaqqissuussinernik kultooritsinnut, pinngortitamut avatangiisitsinnut ileqqutoqqatsinnullu kivitseqataasinnaasut. Kangiata Illorsua pitsaalluinnartumik sinaakkusiivoq festival-eqarnermullu aaqqissuisuulluni,” borgmester Palle Jerimiassen (AI), Avannaata Kommunia, oqarpoq.
Sisoraatinik ujakkaarluni unammineq aamma sikumi maraton-erluni arpanneq
Upernalernerani, 13. april 2024 Ilulissat Icefjord Challenge siullermeertumik ingerlanneqassaaq – sisoraatinik ujakkaarluni oqilaniunneq, maani sisorartartut peqatigiiffiat aaqqissuisoralugu, kommunillu World of Greenland aamma University of Bergen suleqatigivai, sisoraatinik ujakkaarluni oqilaniunneq kikkunnit tamanit peqataaffigineqarsinnaaqqullugu. Unamminissaq sapaatip akunneranik sioqqullugu meeqqat sisoraatinik ujakkaarnermik pikkorissartinneqassapput aamma aaqqissuussinermi nammineq kajumissuseq aallaavigalugu ikiuuttut suleqataassapput.
Kommunip avannarpasinnerusortaani aamma immikkuullarissumik periarfissamik inerisaasoqarsimavoq. Tassa Uummannami 30. marts Ice Maraton illoqarfiup qanittuani sikumi ingerlanneqassaaq. Arpattartut Nunatsinneersut nunanilu allaneersut peqataassapput.
”Aallartilluareerpugut piffissap takornariaqarfiusartup sivitsornissaanik anguniagaqarnerput timitalersorlugu, taamaalillutalu takornariartitsinerup iluani ukioq kaajallallugu isertitaqarnissaq suliffissaqarnissarlu qulakkeerniarlugu; taamaalillunilu ineriartortitsinermut ikorfartueqataasinnaalersillugit,” Borgmester Palle Jerimiassen (AI) oqarpoq.
…………………..
Explore North Greenland & UNESCO Audio Guide
Kommunip nittartagaa nutaaq iserfigiuk, taanna immikkut tikeraat takornariartitsisartullu pillugit pilersitaavoq. Matumani siunertaavoq Avannaa pillugu soqutiginninnerup paasisaqarusunnerullu annertusarneqarnissaa.
Ilulissat kangerluat aamma UNESCO-p nunataa Ilulissat eqqaanniittoq oqaluttuanik kultoorimut, ileqqutoqqanut aamma pinngortitamut ukiut untritillit arlalippassuit ingerlaneranni piusimasunik ulikkaarpoq. Kommunip ineriartortissimavaa sukumiisumik paasisassarsiorfik, pinngortitaq immikkuullarissoq Ilulissallu eqqaa, UNESCO-mit nunarsuarmioqatigiinnut eriagisassatut kingornussassatullu suaarutigineqarsimasoq, pillugit.