airplanebooksbriefcase business cogs cross election entertainment fish house law lockmedicalpeopleselfservices socialtax

Ilulissani atuartut Uummannamit alisissumit atuartinneqalersut

Atuarfik Jรธrgen Brรธnlundimi 8. aamma 9. klassemi atuartut Uummannami atuarfimmit ullumikkut tallimanngornermiit alisissumit atuartinneqalerput. Alisissumit atuartitsinikkut atuartut ilikkagassamikkut kinguaattuunnginnissaat qulakkeerniarneqassaaq aammalu ilinniartitsisunik marlunnik atorfinitsitsisoqarnissaata tungaanut ingerlanneqassalluni.
5. marts 2021
Ilulissani Atuarfik Jørgen Brønlundimi 8. aamma 9. klassemi atuartut 32-t iPaditik atorlugit Uummannami Atuarfik Edvard Kruse-mi ilinniartitsisunit marlunnit atuartinneqalerput.

Atuartut atuartitsinermi iPadimikkut imaluunniit iikkami isiginnaarussuakkut imminnut takusinnaallutik tusaasinnaalllutillu tiguartisimaqalutik malinnaaqqissaarput. Inimi atuartitsivimmi nipaalluinnarpoq, taamaallaallu Uummannami ilinniartitsisoq Ilulissanilu atuartut ataasiakkaat oqaloqatigiinnerat nipisiassaapput.

- Ilinniartitsisut marluk soraarniuteqareernerisa kingorna atuartut angajoqqaavisa meeqqamik paarlattaanerusunit atuartinneqartarnerat naammagittaalliutigimmassuk aammalu atuartut ilikkagassaat qulakkeerusukkatsigit atuartitsissutini arlalinni alisissumit atuartitsineq aallartinnialerparput. Taamaammat neriuutigaarput alisissumit atuartitsinikkut apriilimilu ilinniartitsisunik atorfinitsitsinissatta tungaanut atuartut ilikkagassamikkut kinguaattuussanngitsut, Nielsine P. Kruse Atuarfik Jørgen Brønlundimi pisortaq oqarpoq.

Alisissumit atuartitsinissaq påskep tungaanut ingerlanneqassaaq. Uummannamilu Atuarfik Edvard Krusemeersut tallimanngorpamiit alisissumit atuartitsilernissartik qilanaaraat.

- Uummannami ilinniartitsisut marluk Ilulissani atuartunik atuartitsinissartik kisiat ukkatarissavaat atuartunillu allanik peqataatitsisoqassanngilaq. Alisissumit atuartitsinissarput ukioq manna aggustimi Uummannap nunaqarfiinut alisissumit atuartitsilernissatsinnut misiliutigissavarput. Maannalu misilittagaqalernissatsinnut periarfissaqalissaagut ilutigalugulu Ilulissani atuartut ilinniarsimasunit atuartinneqarnissaannut qulakkeerinneqataassaagut, Tim Arnoldi Uummannami Atuarfik Edvard Kruse-mi pisortaq ilisimatitsivoq.

Atuartut 32-usut ataasinngornermiit tallimanngornerup tungaanut matematikkimik uumassusilerinermik aammalu nunalerinermik atuartinneqassapput. Atuartitsissutit tamarmik immikkut nalunaaquttap akunnerata aappaa avillugu sivisussuseqartassaaq.

Uummannami ilinniartitsisussat saniatigut Ilulissani atuartut atuarfimminni ilinniartitsisumit aammalu paarlattaasartumit iPadit tungaasigut ikiorneqassapput.

Annertunerusumik paasisaqarusuttut ukununnga saaffiginnissinnaapput: Jens Kristian Therkelsen, Ineriartornermut Ataatsimiititaliami siulittaasoq mobilnormu 54 83 03 aamma Lene Ravn Danielsen ataatsimiititaliami taaneqartumi ilaasortaasoq mobilnormu 54 48 71.

Allattoq assiliisorlu: Káte Hansen, khan@avannaata.gl

Atuartitsinermi nutaami atuartut malinnaaqqissaarput.