Neqerooruteqarneq Avannaata Kommuniani illoqarfinni sisamani maannamuugallartoq atuuppoq, taamaattorli kikkulluunniit illoqarfimmiittut – aamma nunaqarfinneersuugaanni – illoqarfinni sisamani akiuussutissamik kapitissinnaapput.
Peqqinnissaqarfiup Avannaani immikkoortortaa corona.gl-imi immikkut qupperneqalersimalluni paasissutissiissutigineqarpoq, innuttaasut najukkaminni napparsimmaveqarfimmut sianerlutik coronamut akiuussutissamik kapitinnissamik isumaqatigiissuteqarsinnaasut. Ilulissani ataavartumik akiuussusersuisoqarpoq, taakkulu corona.gl-imi aamma facebookikkut nalunaarutigineqartarput.
- Illoqarfitsinni akiuussusersuinerit annertuut naammassisimalereerpagut. Kikkut tamarmik neqeroorfigineqarsimalereerput. Taamaammat kingulliit kapitinnissaannut ilanngukkusullugit peqqinnissaqarfimmi immikkoortortatsinni ataavartumik akiuussusersuinermik neqerooruteqarpugut. Amerlasuut akiuussusersorneqarnissaat qulakkeerniarlugu nalunaarutigineqartartunik alapernaannissaq pingaaruteqarpoq, Peter Vedsted Peqqinnissaqarfiup Avannaani immikkoortortaqarfiani nakorsatut aqutsisuusoq uppernarsaavoq.
Illoqarfinni sisamani taaneqartuni suut neqeroorutigineqarnersut corona.gl-imi uani takuneqarsinnaapput: https://corona.nun.gl/emner/vaccination/vaccination_avannaa?sc_lang=kl-gl
Allattoq: Káte Hansen, khan@avannaata.gl