airplanebooksbriefcase business cogs cross election entertainment fish house law lockmedicalpeopleselfservices socialtax

Umiarsuarni takornariartaatini ilaasunut akitsuut illoqarfinnut nuna-qarfinnullu tutsinneqartariaqarpoq

Najugarisatsinni annertunerusumik sunniuteqarsinnaalertariaqarpugut, umiarsuit qassit tikissanersut, akitsuutinillu akiliutaasa ilaannit pissarseqataatinneqartariaqarpugutโ€ taama oqarpoq borgmester Palle Jerimiassen.
24. maj 2023

TUSAGASSIORFITSIGUT NALUNAARUT

Aasalerpoq, umiarsuillu takornariartaatit aatsaat taama amerlatigisut tikissamaarpalulerput.

Avannaata Kommuniani sineriaani inoqarfinnut umiarsuit takornariartaatit 100-eriarlutik 30.000 pallillugit ilaasoralugit tikittussaarpalupput. Ilulissat amerlanerpaanit tikinneqassaaq, 80-eriarluni tikinneqassagami. Tassa takornariat amerleriassapput, tamannalu kommunimi politikkerisatsinnut naapertuuppoq.

Taamaakkaluartorli borgmester Palle Jerimiassen piareersimavoq umiarsuarnut takornariartaatinut qujaannarnissaminut imaluunniit tikittarneri killilerujussuassallugit, Kalaallit Nunaanni inoqarfinni ataasiakkaani tikinneqartarnerit aningaasarsiutigineqarsinnaanerilu pillugit annertunerusumik sunniuteqarsinnaatitsisoqalinngippat.

”Killissaa tikissimavarput. Periarfissagut tunngavigalugit umiarsuit taama amerlatigisut isumagisinnaanngilagut. Takornariaqarneq pisinnaasagut aallaavigalugit ineriartortittariaqarparput, aamma takornariat akileeqataasariaqarput kiffartuussinissatsinni atortulersuutit pisariaqartinneqartut pitsanngorsarnissaannut, aammalu kommunitsinni takornariartitsineq aningaasarsiutigisinnaaniassagatsigu, ullumikkutut aningaasartuutigiinnarnagu; tamannalu attatiinnarsinnaanngilarput. Najugarisatsinni annertunerusumik sunniuteqarsinnaalertariaqarpugut, umiarsuit qassit tikissanersut, akitsuutinillu akiliutaasa ilaannit pissarseqataatinneqartariaqarpugut” taama oqarpoq borgmester Palle Jerimiassen.

Savalimmiuni inoqarfinni umiarsualiveqarfinni ingerlatseqatigiiffiit kommunillu tamarmik immikkut umiarsuarnik takornariartaatinik akitsuutinik akiliisitsisarput taakkulu namminneq isertitarisarlugit. Thorshavn-imi kommuni umiarsualiveqarfimmi ingerlatseqatigiiffiliorsimavoq, tassanngaaniillu umiarsuarnut takornariartaatinut toqqaannartumik akiligassiisoqartarpoq, taamaalillutillu isertitaqartarlutik kiffartuussinerminni atortulersuutiminnik ineriartortitsinerminni pitsanngorsaanerminnilu atortakkaminnik.

Kalaallit Nunaanni akitsuutit qitiusumiit akilersinniarneqartarput, qitiusumilu tigummiinnarneqartarlutik. 2022-imi umiarsuit takornariartaatit kr. 1,7 mio.-nik akiliisinneqarsimapput Ilulissanut, Uummannamut, Upernavimmut Qaanaamullu tikinnerminni.

”Illoqarfinni taakkunani akitsuutinit taakkunannga koruunimik ataatsimilluunniit pissarsinngilagut. Umiarsuilli tamaanga tikipput, tamannalu aningaasartuutigaarput puttasut, eqqagassalerinerit, saligaatsuutitsiniarnerit il.il. eqqarsaatigalugit. Taamaattumik allannguisoqartariaqarluinnarpoq, umiarsuarnut takornariartaatinut taama amerlatigisunut tikilluaqqusiuassagutta”, borgmesteri oqarpoq.

Nunaqarfik Ilimanaq 50-nik inoqarpoq, umiarsuillu tamarmik immikkut takornarianik 1180-nik ilaasoqarlutik tikissamaarput. Uummannamut 1.500-nik inulimmut, qaammatit pingasut ingerlanerinnaanni umiarsuit 22-it tikissamaarput takornarianik 4.800-nik ilaasoqarlutik.

”Tamanna annertoorujussuuvoq inoqarfiit inukittunnguuneri eqqarsaatigalugit, takornariartitsinerlu piujuaannartitsinermik annertunerusumik tunngavilik qulakkeerusupparput, umiarsuarnit takornariartaatinit akitsuutiinik atuilluta talittarfinnik takornarianullu kiffartuussinermi atortulersuutinik allanik pitsanngorsaanissamut.” taama oqarpoq Palle Jerimiassen.

Borgmesterip nuannaarutiginerarpaa Visit Greenland-imit nalunaarusiaq nutaaq, tassani umiarsuit takornariartaatit Nunatsinnut tikittartut pillugit. Tassani ilaatigut eqqaaneqarpoq akitsuutinik akiliisitsisarneq eqqarsaatigalugu Nunarput akikinnerpaanut ilaasoq. Tikinneqartartut allat soorlu Anchorage, Rønne aamma Shetland-ip qeqertai Nunatsinni akitsuutigitinneqartumut sanilliullugu marloriaammik allaammi pingasoriaammik akisunermik akitsuuteqartitsipput.

Umiarsuit qassit tikittarnissaat pillugu sunniuteqarnissamik piumasaqaat

Avannaata Kommuniani takornariat nuannarineqarput, takornariartitsinerullu siunissami pingaarutilimmik isertitaqaataalerumaartussatut salliutinneqarluni ineriartortinneqarnera iluarisimaarneqarluni. Visit Greenland-imit nalunaarummi aamma eqqaaneqarpoq, umiarsuit takornariartaatit pitsaasumik sunniuteqartut eqqarsaatigalugu takornariat Nunatsinnut tikittartut Nunatta sineriaanut siammarneqartarmata. Tamannali pitsaanerusumik pilersaarusiorneqartariaqarpoq. Visit Greenlandip umiarsuarnik tikittussanik allassimaffiutini Cruise Call List nutarteraangagu aatsaat illoqarfii tkommunillu takusarpaat tikittussat amerlassusii.

”Tamanna allanngortariaqarpoq, uagut najukkani ataasiakkaani sunniuteqaqataalersinneqartariaqarpugut umiarsuit takornariartaatit qaqugukkut takornarianillu qassinik ilaasoqarlutik tikittassanersut. Siunissaq eqqarsaatialugu ajutoorutaasinnaasoq annilaangatigisinnaasarput tassa takornarianut tikikkuminartuunitta innarlerneqarsinnaanera, aammalu aaqqissuussiffigissalluta ataatsimeersuarfigissallutalu pilerinartuunitta akornuserneqarnera.” borgmesteri oqarpoq.

Politikkikkut eqqumaffigineqarpoq takornariaqarnerup annertusiartornera ima pisariaqartoq, tamaani najugaqavissut illoqarfimminni angerlarsimasutut misigisimaannarnissaat innarlerneqassanani, taamaammallu innuttaasunut soqutiginaatilinnik kultoorikkut timersornikkullu aaqqissuussinerit amerlanerusut ingerlanneqartarnissaat salliutinneqarusulluni. 2023-ip aasaanerani qaannamik Nunatsinni pissartanngorniuttoqartussaavoq. Inuit Issittormiut Kattuffiat ataatsimiittussaavoq kultoorikkut aaqqissuussanik ilaqartinneqarluni, unnuakkut isorartuumut arpaliutsitsineq Midnight Marathon ingerlanneqartussaalluni, aammalu pakassumminnermik unammersuartitsisoqartussaalluni. Akunnittarfiit unnuisarfiillu allat tamarmik aasaaneranut ulikkaareerneqarsimapput, ilaallutik takornariat illoqarfinnut tikittartut akunnittarfinnilu ulluni arlalinni unnuisartut. Tamatumani oqimaaqatigiissitsiniarnissaq borgmesterip pingaartuutippaa, kikkut tamarmik nuannersumik misigisaqarnissaat qulakkeerumallugu.

Aammattaaq soqutigalugu malinnaavigisimavaa nunani allani umiarsuit takornariartaatit tikittarneri pillugit innuttaasut akornanni qanoq qisuariaatoqartarnera.

”Europap kujasissuani innuttaasut illoqarfiit aqquserngini illoqannginnersanut aniallutik isummaminnik takutitsiortortarput takornariat amerlavallaalersarneri pillugit, ingammik umiarsuit takornariartaatit takornariarpassuarnik ilaasoqarlutik tikittartut eqqarsaatigalugit. Tamakku malitsigisarpaat tattoqisaannerit, nungullarsaanerit eqqakkallu, kiisalu pineqartuni innuttaasut iluaalliorneri. Maani tamakku pinngitsoortittariaqarpagut, taamaattumillu sunniuteqaqataalertariaqarpugut, umiarsuit takornariartaatit sumut qanorlu amerlatigisut tikittarnissaat pillugu.” Palle Jerimiassen oqarpoq.

Annilaangassutiginngilaalu umiarsuarnut ilaallutik takornariat tikittarunnaarnissaat.

”Nunatta kitaata avannaa ornissallugu pilerigineqartorujussuuvoq. Takornariartitsinermik ingerlatseqatigiiffippassuit assinik maanngaaneersunik ussassaarinerminni atuisarput, maanilu najukkatsinnut soqutiginninneq alliartuinnavissutut misigivarput. Taamaattumik umiarsuarnut ilaallutik takornariat misigisaqarluartarnissaat qulakkiissagutsigu pissutsit matumani uparuartukkakka eqqumaffigineqartariaqarput. Nuna manna immikkuullarissoq, assissaqanngitsumik kusanassuseqartoq nungullartitersimanngitsoq takornarianit tikinneqarsinnaajuaannartariaqarpoq, inussiarnersunik tikilluaqqusisunillu innuttalik, avataaneersunillu takornarianik qanoq ittuugaluartunik tikilluaqqusisut.” borgmesteri oqarpoq.