”Cirkus nuanneqaaq. Maanna suulluunniit malittuinnarmik akoqattaarsinnaalerpakka: Kinamiut puugutaat, arsat issiaviillu” Nadia Bidstrup oqaluttuarpoq, taanna Kullorsuarmi 7. klassemi atuartuuvoq.
Nadia, Kullorsuarmi atuartut allat peqatigalugit, sapaatip akunnerata ingerlanerani atuarfimmi sammisassanut ilaagitillugit sammisimavaat cirkus, qitinneq, skak aamma filmit.
Atuartut ullaap tungaani atuartinneqartarput ualikkullu namminneq toqqarsimasaminnik sammisaqarlutik.
”Filmi toqqarsimavara, festivalernerlu tamaat filmiliarisimallugu. Ilikkagarpassuaqarpunga filmiliorneq pillugu, filmimik qiortaaneq nipitalersuinerlu,” Petra Bidstrup Kullorsuarmi 9. klassemi atuartoq oqaluttuarpoq.
Avannaata Kommuniani sunngiffimmi pisortap Birgitta Kammann Danielsenip festivali Upernaviup eqqaani aaqqissuussimavaa Islandimi suleqatigisartakkani suleqatigalugit, taakku tassa skakkernermik peqatigiiffik ”Hrokurinn” aamma peqatigiiffik ”Vinatta i verki”, nuannaaqaarlu.
”Atuarfik tamakkerlugu assorujussuaq nuannisarpugut piginnaanerillu saqquminngitsut qaffakaatillugit. Atuarfimmiinnaanngitsoq, nunaqarfimmili tamarmi,” Birgitta oqaluttuarpoq.
Festivali Kullorsuarmi pingajussaa ingerlanneqarpoq.
”Islandimi skakkertartut peqatigiiffiat Hrokurinn suleqatigilluartorujussuuarput ukioq mannalu tassanngaaniit peqataasut ilaat qitinnermik ilitsersuisuuvoq, ataaseq filmiliornermik ilisimasalik, marluk cirkus-imi takutitsisartut ataaserlu malittuinnarmik akoqattaarisartoq,” Birgitta Kammann Danielsen oqaluttuarpoq.
Sapaatip akunnerata ingerlanerani atuartut kisimik festivalimik ingerlatitsiartortunit nuannisartinneqanngillat. Unnuimmi tamaasa timersortarfeeqqami nunaqarfimmiunut tamanut susassaqartitsisoqarsimavoq, assersuutigalugu ilaqutariinnut cirkus, meeqqanut inersimasunullu skakkerneq. Meeqqallu atuarfimmi atuartinneqaraluartut, unnukkut angajoqqaatik, aanaakkutik/aataakkutik ilagalugit takkuttarsimapput.
”Arsanik atorlunga angerlaallugit sungiusarpunga arsat pingasut malittuinnarmik akoqattaarsinnaaniassagakkit. Nuanneqaaq, unnukkullu aamma ilaqutariinnut cirkus-imut peqataavunga. Maanna arsat kina-miullu puugutaat atorlugit malittuinnarmik akoqattaarisinnaalerlunga,” Gedion Nielsen 11-nik ukiulik oqaluttuarpoq.
Sungiusarneq medalje-natsitsivoq
Arfineq marlunnik ukiulik Sam Olsen Kullorsuarmeersoq skakkernermik unamminermi peqataavoq, aanaavalu Pernille Olsen tulluusimaaqaaq, Sammip angusai pillugit.
”Sammi skakkerluni unamminermi peqataarusuttorujussuugami, sapaatillu akunnerata ingerlanerani sungiusartorujussuuvoq. Atuarfimmi skakkernermik ilinniartinneqartarput, Sammili medalje-nakkusussimavoq, taamaattumik mobil-imini app nassaarivaa, taannalu atorlugu ualeq tamakkerlugu sungiusartarsimavoq – uagullu angerlarsimaffitsinni nipaarsaartariaqarsimavugut,” Pernille Olsen qungujulluni oqaluttuarpoq. ”Tulluusimaarutigeqaara anguniakkaminik siunniussisimanera angullugulu.”
