Allatto Borgmester Palle Jerimiassen (AI), Avannaata Kommunia
Ilulissat eqqaani qamuteralannik atuisinnaaneq pillugu oqallinneq aallarteqqippoq. Qaava tungaani ima isikkoqaraluarpoq, oqallinneq taamaallaat innuttaasut ilaannaanut kommunimullu tunngassuteqartoq. Ilumoortorli uaniippoq, kommunimi politikkikkut kissaatigisat illoqarfiullu eqqaani qamuteralannik torersumik atuisinnaanerup ammaanneqarnissaanut qinnuteqaatit Namminersorlutik Oqartussanit unitsinneqarsimammata.
Ilulissat kangerluata Kangiata paatungaani kinguaariit arlallit piniarnermik kingornalu aalisarnermik ingerlataqarsimapput. Siusinnerusukkut aalisartut pisaminnik qimussimik tunitsivissaminnut assartuisarnikuupput. Ullumikkut silaannaap allanngoriartornerata kingunerisaanik pissutsit tamakku allanngortissimavaat, maannalu aalisarnermi takornarialerinermilu qamuteralannik atuineq ilaalersimavoq.
Ilulissani innuttaasut, taakkununnga ilaallutik aalisartut, takornariat ilaqutariillu, Kangianut angalasarnerminni qamuteralaat qimussillu atortarpaat. Tamakkuli assut ajuusaarnartumik allaffissornikkut politikkikkullu Namminersorlutik Oqartussat tungaaniit unammillerneqarput. Tamakku pipput, naak uanga borgmesteritut arlaleriarlunga oqaloqatiginninniartarsimagaluartunga aaqqiissutaasinnaasut pillugit.
Kangianut qamuteralaat aqqutissaat, Namminersorlutik Oqartussanit akueriniarneqarsimagaluartoq killilersuutinik ulikkaarpoq. Tamatumunnga ilaatigut pissutaavoq nuna UNESCO-p immikkut eriagisassatut akuerisimammagu. Ukiulernerani tamaani aputikittarpoq aqqutigineqarsinnaasaranilu. Pissutsinik piviusunik takunnikkumanginneq taamaattoq, eqqaasitsisuuvoq UNESCO-p nunaminertamik eriagisassanngortitsisimanera, illersuutissatullu killeqarfiliisimanera, qamuteralannik atuisinnaanermut naammaginanngilluinnartumik killiliisimasoq, tamannalu innuttaasut ulluinnarni inuuniarnerannut sakkortuumik tatisisuusoq.
Tamatuma saniatigut Namminersorlutik Oqartussat imeqarfik illersorniarlugu killeqarfik annertoorujussuaq qamuteralannut ingerlaffigeqqujunnaarsimammagu, tamannalu innuttaasut qamuteralannik atuisinnaanerannut, assersuutigalugu Kangerluarsuliarnerminni Oqaatsuliarnerminniluunniit.
Paasisinnaalluarpara imeqarfitta paarilluarneqarnissaa, nunanili allani misilittakkat takutippaat, tatsit imeqarfiusut ukiukkut sikuuneranni motorilinnik angallaffiugaluaraangamik ajoqutigineq ajoraat. Norge-mi qamuteralannik atuisinnaaneq akuerineqartarpoq sumiiffinni misissuinerit najoqqutassallu tunngavigalugit. Siunnersuutigisimavaralu inatsisiliornerput allanngortinneqarsinnaasoq Norskit inatsisiliornerannut assigusunngorlugu. Namminersorlutilli Oqartussat siunnersuutinut taamaattunut qinnuteqaatinullu qisuarianngilluinnarsimapput.
Siunnersuutigut qinnuteqaatigullu Namminersorlutik Oqartussanit suusupagineqarput. Allaanngilaq ima isumaliortut, ajornartorsiutit tamakku namminneerlutik qaangiukkumaartut. Taamaattumik piffissanngorsorivara apeqqutigeqqissallugu, sooq Norge-mi misilittakkat atorumaneqannginnersut, aamma sooq UNESCO-p eriagisassarititaanik nunamik, ulluinnarmi inuuniarnitsinnut taama killilersuitigisumik, mattusimaneqartuassasugut.
Kingumut Avatangiisinut Naalakkersuisoq Kalistat Lund, kaammattorusuppara apeqqummi matumani piaartumik iliuuseqaqqullugu. Piffissanngorpoq Ilulissani innuttaasunut inuussutissarsiummillu ingerlataqartunut pitsaanerusumik siuariartuutaasinnaasunillu atugassaqartitsinissap qulakkeerneqarnissaa.